Туркиянинг эпицентри Қаҳрамонмараш вилоятида жойлашган зилзилалар оқибатида қурбон бўлганлар сони 42 310 кишига етди. Бу ҳақда мамлакат Фавқулодда вазиятлар ва табиий офатларга қарши курашиш бошқармаси (AFAD)га таяниб Anadolu хабар берди.

Ҳалок бўлганлар Қаҳрамонмараш, Газиантеп, Шонлиурфа, Диёрбакир, Адана, Адияман, Усмония, Ҳатай, Килис, Малатя ва Элозиқ вилоятларида қайд этилган. Табиий офат ҳудудларидан эвакуация қилинганлар сони 448 минг кишидан ошган.

Айни вақтда зилзилалар ҳудудларида AFAD, Туркия Қуролли Кучлари, ноҳукумат ташкилотлар, шунингдек, халқаро тузилмалардан келган 14 740 минг ходим қидирув-қутқарув ишларини олиб бормоқда. Умумий ҳисобда зилзилалар зонасида 242 392 киши, жумладан, полиция, жандармерия, тез ёрдам бригадалари фаолият олиб боряпти.

Вайроналарни тозалашга 13,7 мингта техника, хусусан, экскаваторлар, эвакуаторлар, кранлар, бульдозер, юк машиналар, тиркамалар ва бошқа қурилиш техникалари жалб этилган. Миллий мудофаа вазирлиги ва Соҳилбўйи қўриқлаш қўмондонлиги шахсий таркиб, гуманитар ёрдам ва аҳолини эвакуация қилиш учун жами 38 та денгиз кемасини ажратган.

Табиий офатдан зарар кўрган ҳудудларга 301 мингдан ортиқ палаткалар, 6,3 мингдан зиёд модуль уйлар тикланган.

Эслатиб ўтамиз, магнитудаси 7,7 га тенг зилзила 6 февраль тонгида Сурия чегарасидаги Қаҳрамонмараш туманида кузатилган. Туркия президенти Ражаб Тоййиб Эрдўғоннинг айтишича, ҳалокат 10 та вилоятга таъсир кўрсатган ва сўнгги 84 йил ичидаги энг ҳалокатлиси ҳисобланади: 1939 йилда Туркияда содир бўлган зилзила оқибатида 30 мингдан ортиқ одам ҳалок бўлганди.

Туркия вице-президенти Фуат Октайнинг айтишича, зилзилаларда инсонларнинг оммавий ҳалок бўлишида айбдор дея гумонланаётган камида 113 кишини ҳибсга олишга ордер берилган. Тергов давомида бир неча киши ҳибсга олинган. 11 февраль куни Истанбул аэропортида Меҳмет Яшар Кошкун ушланганди — у зилзила вақтида бутунлай қулаб тушган 12 қаватли турар жой биносининг қурилиши билан шуғулланган пудратчидир. Anadolu агентлиги маълумотларига кўра, у Черногорияга учиб кетмоқчи бўлган. Мазкур аэропортда 12 февраль куни Явуз Каракуш исмли яна бир пудратчи рафиқаси билан қўлга олинган, улар Грузияга учмоқчи бўлган.