Польша ҳукумати Россия ва Беларусь чегарасига мудофаа тўсиқларини ўрнатишга қарор қилди. Бу ҳақда Польша мудофаа вазири Мариуш Блашак Twitter’даги саҳифасига ёзиб қолдирди.

«Биз Россия ва Беларусь чегарасида хавфсизлик чораларини кўришни бошладик. Бу бизнинг мудофаа ва тутиб қолиш стратегиямизнинг бир қисмидир. Биринчи тўсиқлар Калининград вилояти билан чегарадош ҳудудларга ўрнатилмоқда», — дейди Блашак.

У Польша—Россия ва Польша—Беларусь чегараларидаги назорат-ўтказиш пунктлари яқинидаги йўлда металл ва бетондан ясалган танкга қарши тўсиқлар акс эттирувчи бир нечта суратни эълон қилган.

2021 йилда Польша миграция инқирози сабаб Беларусь билан чегарада девор қуришни бошлаганди. 2022 йил кузида девор қуриб битказилгани эълон қилинган.

Шунингдек, 2022 йил февралда Польша мудофаа вазири ўринбосари Войцех Скуркевич Россия билан чегарада девор қурилишини айтганди. Калининград вилояти ҳокимлиги матбуот хизматига кўра, гап девор эмас, балки панжара ҳақида кетмоқда.

Аввалроқ Польша Украина армиясида сапёрлар етишмаслиги ҳамда НАТО ўз мутахассисларини жўната олмагани учун миналардан тозалаш операцияси учун Украинага профессионал полициячилар отрядини юборгани тўғрисида хабар берилганди. Шу билан бирга, Польша мудофаа вазири ўринбосари Маркин Оцепа яқин 3–10 йил ичида Россия билан уруш хавфи юқори эканини айтган эди.