Хитой Украина можаросини ҳал этишнинг 12 банддан иборат режасини эълон қилди
Хитой Украина инқирозини бартараф этиш бўйича ўз позициясини эълон қилди. Ҳужжат мамлакат Ташқи ишлар вазирлиги сайтига жойлаштирилган.
Ҳужжат 12 банддан иборат:
- барча мамлакатлар суверенитетини ҳурмат қилиш, халқаро ҳуқуқ ва БМТ низомига риоя этиш;
- совуқ уруш менталитетидан воз кечиш ва «бир давлат хавфсизлиги бошқалар ҳисобига таъминланмаслиги керак» тамойилини қўллаб-қувватлаш;
- ҳарбий ҳаракатларни тўхтатиш, кескинлашувга йўл қўймаслик ҳамда Россия ва Украинанинг диалог томон ҳаракатини қўллаб-қувватлаш;
- можаронинг «ягона ҳаётий ечими» сифатида тинчлик музокараларини қайта тиклаш, Хитой «бу борада конструктив роль» ўйнашга тайёр;
- гуманитар инқирозни бартараф этиш, тинч аҳоли учун гуманитар коридорларни яратиш, инсонпарварлик ёрдамини кўпайтириш, БМТни ушбу соҳадаги фаолият координатори сифатида қўллаб-қувватлаш;
- тинч аҳоли ва ҳарбий асирларни ҳимоя қилиш, шу жумладан, уларни алмашиш учун «қулай шароитлар» яратиш;
- атом электр станцияларининг хавфсизлигини таъминлаш;
- ядровий, кимёвий ёки биологик қуроллардан фойдаланиш таҳдидига қарши курашиш;
- Қора денгиз дон ташаббуси доирасида дон экспортини рағбатлантириш;
- жорий муаммоларни ҳал қилмайдиган, балки янгиларини келтириб чиқарадиган бир томонлама санкцияларни тугатиш;
- ишлаб чиқариш ва таъминот занжирларининг барқарорлигини қўллаб-қувватлаш, жаҳон иқтисодиётидан сиёсий мақсадларда фойдаланишни рад этиш;
- можародан кейинги қайта тиклашни рағбатлантириш, «Хитой бу борада ёрдам беришга ва бу уринишда конструктив роль ўйнашга тайёр».
18 февраль куни Хитой ташқи ишлар вазири Ван И мамлакат тез орада «барча давлатлар суверенитетини» ҳурмат қилган ҳолда Украинадаги можарони тартибга солиш режасини тақдим этишини маълум қилганди. Украина ташқи ишлар вазири Дмитрий Кулебанинг айтишича, Хитой Россия билан муносабатларидан келиб чиқиб, можарони ҳал этишда муҳим роль ўйнаши мумкин.
Аввалроқ Хитойнинг БМТдаги вакили ўринбосари Дай Бин ташкилот Бош Ассамблеяси йиғилишида Украинага қурол-яроғ етказиб бериш орқали тинчликка эришиб бўлмаслигини маълум қилганди.
