«АҚШ Москва ядровий қуролни қўллашидан хавфсирамаяпти» — Politico
АҚШ президенти Жо Байден администрацияси Россия томонидан Украинада ядровий қуролдан фойдаланиш эҳтимоллигини жуда паст деб ҳисоблайди. Бу ҳақда Politico нашри хабар берди.
Нашр манбаларининг сўзларига кўра, бундай позицияни 23 феврал куни АҚШ президентининг миллий хавфсизлик бўйича маслаҳатчиси Жейк Салливан экспертлар гуруҳи билан суҳбатда билдирган.
«Салливан Владимир Путин Украинага ёки Ғарб иттифоқчиларига қарши стратегик ядровий қуролланишни қўллаши мумкинлиги борасида хатар йўқлигини айтди», дейилади мақолада.
Бундан ташқари, Салливан Байден ва Украина президенти Владимир Зеленскийнинг суҳбати мазмунини ҳам ошкор этган. Киевдаги учрашувда президентлар уруш тугаганидан кейин АҚШнинг Украина олдидаги эҳтимолий «мажбурияти»ни муҳокама қилган.
Россия президенти Владимир Путин 21 феврал куни Федерал мажлисга йиллик мурожаатида унинг мамлакати АҚШ билан имзоланган стратегик ҳужум қуролларини қисқартириш бўйича шартномадан чиқишини айтганди. «Агар Қўшма Штатлар ядровий қуролни синовдан ўтказса, биз ҳам буни амалга оширамиз. Ҳеч кимда глобал стратегик вазиятнинг барбод бўлиши мумкинлиги ҳақида қараш бўлмаслиги керак», — дея қўшимча қилди Путин.
Мавзуга доир: Байден Хитойнинг Украинада тинчликни таъминлаш режасини «фақат Россия учун фойдали» деб атади
Ўз навбатида АҚШ президентининг миллий хавфсизлик бўйича маслаҳатчиси Жейк Салливан Путиннинг Ғарб борасидаги айбловини «бемаънилик» деб атаган. «Ҳеч ким Россияга ҳужум қилмади. Россияга Украина ёки бошқа бирор томондан ҳарбий таҳдид мавжудлиги борасида шунақа бемаъни тасаввур бор», — дейди Салливан.
