Украинада тинчликни таъминлаш борасида Хитой томонидан таклиф этилган режа фақат Россия фойдасига хизмат қилади. Бу ҳақда АҚШ президенти Жо Байден маълум қилди, деб хабар беради Reuters.

«Россия президенти Владимир Путин унга қарсак чаляпти, шундай экан у қанақасига яхши бўлиши мумкин?» — дейди Байден.

АҚШ президенти Хитойнинг Украина учун «мутлақо адолатсиз уруш»нинг якуни бўйича музокараларда иштирок этишига уринишнинг ўзини «мантиқсиз» деб атаган.

Хитой Украина инқирозини бартараф этиш бўйича ўз позициясини эълон қилди. 12 банддан иборат ҳужжатда барча мамлакатлар суверенитетини ҳурмат қилиш, халқаро ҳуқуқ ва БМТ низомига риоя этиш шарти келтирилган.

Россия Ташқи ишлар вазирлиги мазкур режага изоҳ берар экан, Москва «хитойлик дўстларнинг Украинадаги можарони тинч йўл билан ҳал қилишга ҳисса қўшишга самимий интилиши»ни олқишлашини билдирган.

18 февраль куни Хитой ташқи ишлар вазири Ван И мамлакат тез орада «барча давлатлар суверенитетини» ҳурмат қилган ҳолда Украинадаги можарони тартибга солиш режасини тақдим этишини маълум қилганди. Украина ташқи ишлар вазири Дмитрий Кулебанинг айтишича, Хитой Россия билан муносабатларидан келиб чиқиб, можарони ҳал этишда муҳим роль ўйнаши мумкин.

Аввалроқ Хитойнинг БМТдаги вакили ўринбосари Дай Бин ташкилот Бош Ассамблеяси йиғилишида Украинага қурол-яроғ етказиб бериш орқали тинчликка эришиб бўлмаслигини маълум қилганди.