Bloomberg маълумотларига кўра, Украинадаги урушнинг дастлабки бир йили давомида россиялик 23 миллиардернинг умумий бойлиги 67 миллиард долларга камайган. Агентлик ҳисоб-китобларига кўра, энг катта йўқотишни «Северстал»нинг асосий эгаси Алексей Мордашов кўрган. У Украинада ҳарбий амалиётлар ўтказилган бир йил давомида 6,7 миллиард доллар йўқотган. Йўқотишлар бўйича иккинчи ўринни 5,8 миллиард доллар билан NLMK Group директорлар кенгаши раиси Владимир Лисин эгаллаган. «Челси» футбол клубининг собиқ эгаси Роман Абрамович молиявий йўқотишлар бўйича биринчи учликни ёпган. У Украинадаги уруш сабабли 2022 йилда 5,6 миллиард доллар йўқотган.

Шунингдек, агентликнинг аниқлашича, Россияда 2022 йил охирига келиб бойлиги ошган миллиардерлар ҳам бор. Улар орасида, хусусан, PhosAgro бош директори Андрей Гурев (2,1 миллиард долларган кўпайган) ва USM холдинг асосчиси Алишер Усмонов (1,2 миллиард долларга кўпайган) бор.

Дунёнинг энг бадавлат 500 кишиси қаторига кирган 23 нафар россиялик миллиардернинг умумий бойлиги 202 йил 23 февралда, Владимир Путин қўшинлари Украинага бостириб киришидан бир кун олдин 339 миллиард долларга тенг бўлган.

Эслатиб ўтамиз, аввалроқ эълон қилинган маълумотларга кўра, россиялик миллиардер Алишер Усмоновнинг бойлиги 2023 йил бошидан бери 1,26 миллиард долларга кўпайиб, 19,7 миллиард долларга етганди.