Шавкат Мирзиёев 26 февраль куни Туркия президенти Режеп Таййип Эрдўғон билан телефон орқали суҳбатлашди. Бу ҳақда Президент матбуот хизмати хабар берди.

Мулоқот аввалида Шавкат Мирзиёев Режеп Таййип Эрдўғонни таваллуд куни билан самимий қутлаб, унга мустаҳкам соғлик ва катта муваффақиятлар ҳамда қардош турк халқига тинчлик-осойишталик ва равнақ тилади. Хусусан, Ўзбекистон-Туркия муносабатлари бугунги кенг кўламли стратегик шериклик ва кўп қиррали ҳамкорликдек юксак даражага кўтарилишида Эрдўғаннинг шахсий ҳиссаси алоҳида қайд этилди.

Шунингдек, Мирзиёев Туркиянинг жануби-шарқий музофотларида содир бўлган вайронкор зилзилалар муносабати билан яна бир бор далда сўзларини изҳор этди ва уларнинг оқибатларини бартараф этишда зарур ёрдамни кўрсатишга тайёрлигини тасдиқлади. Ўз навбатида, Туркия президенти энг мураккаб паллада кўрсатилган кўмак учун Ўзбекистон президенти ва халқига чуқур миннатдорлик билдирди.

«Қутқарувчилар ва тиббиёт ходимларининг фаолияти туфайли ўнлаб инсонларнинг ҳаёти сақлаб қолинди, Ҳатай музофотининг минглаб аҳолисига малакали ёрдам кўрсатилди. Бундан ташқари, Ўзбекистон маданияти ва санъати, зиёлилари ва жамоатчилик вакилларининг саъй-ҳаракатлари катта маънавий кўмак бўлди», — дейилади телефон суҳбатида.

Бундан ташқари, суҳбатда икки томонлама ҳамкорликнинг долзарб масалалари муҳокама қилинди. Хусусан, 2022 йилнинг ноябрь ойида Самарқанд шаҳрида ўтган олий даражадаги учрашувда эришилган келишувларни сўзсиз амалга ошириш муҳимлиги қайд этилди. Бўлажак учрашувлар режаси, шу жумладан Ўзбекистон-Туркия стратегик ҳамкорлик кенгашининг навбатдаги йиғилишига ҳамда Туркий давлатлар ташкилотининг норасмий саммити тадбирларига тайёргарлик кўриш масалалари ҳам кўриб чиқилди.