Германия мудофаа вазири Борис Писториус ARD телеканали эфирида немис, америкалик ва полшалик ҳарбий хизматчилар Полша ҳудудида қўшма ўқув машғулотларини ўтказишини маълум қилди.

Қайд этилишича, манёврлар тез кунларда содир бўлиши мумкин, у Болтиқ ва Шарқий Европа давлатларининг бир-бирини қўллаб-қувватлаш рамзига айланиб, Германия ва АҚШ НАТОга аъзо сифатида мудофаа борасидаги мажбуриятларини бажараётганини кўрсатиб беради. Шунингдек, бу Россия президенти Владимир Путинга «НАТО у ўйлаганидек кучсиз эмаслиги» ҳақида сигналга айланади.

Писториуснинг сўзларига кўра, Шимолий Атлантика альянси Украинада ҳарбий ҳаракатлар бошланган вақтдан кўра, «кучлироқ ва бирдамроққа» айланган.

Бундан ташқари, мудофаа вазири Германия мудофаа бюджетини ошириш таклифи билан чиққан. Январь ойида Frankfurter Allgemeine Zeitung 2023 йилда мамлакат Мудофаа вазирлигининг бюджетига 50 миллиард евро ажратилгани ва 100 миллиардлик махсус фонд бўлишига қарамай, жуда кам маблағ ажратилганини ёзганди. Газета маълумотларига кўра, манёврлар учун кетадиган харажат 340 миллион еврога баҳоланмоқда, идора ихтиёрида эса 253 миллио евро бор.

Bloomberg’нинг ёзишича, Украинани қўллаб-қувватлаш харажатлари сабаб мамлакат ҳарбий бюдетини 2024 йилда камида 10,7 миллиард еврога ошириши лозим. Таъкидлаш керакки, 2022 йилда Берлин Украинага 12 миллиард евродан ортиқ ёрдам кўрсатган.

Аввалроқ Полша Украина армиясида сапёрлар етишмаслиги ҳамда НАТО ўз мутахассисларини жўната олмагани учун миналардан тозалаш операцияси учун Украинага профессионал полициячилар отрядини юборгани тўғрисида хабар берилганди. Шу билан бирга, Полша мудофаа вазири ўринбосари Маркин Оцепа яқин 3–10 йил ичида Россия билан уруш хавфи юқори эканини айтган эди.