Тошкентнинг «Ҳумо» хоккей клуби Қозоғистон Про Лигаси плей-оффидан ўрин олган «Горняк» жамоасига қарши иккинчи сафар ўйинини ўтказди. Сафарда бўлиб ўтган учрашув 4:2 ҳисобида ўзбекистонликлар фойдасига якунланди.

«Ҳумо» ўтган ҳафтада ушбу жамоага қарши иккита уй учрашувида музга чиқиб, 2:1, 4:2 ҳисобларидаги ғалабаларни расмийлаштирган эди. Қозоғистонда ўтказилган сафардаги илк учрашувда ҳам 2:1 ҳисобида зафар қучган Тошкент жамоаси бугунги ғалабадан сўнг умумий ҳисоб 4:0 га етди. Шу тариқа Тошкент клуби тўртта баҳснинг барчасида ғалаба қозонган ҳолда юз фоизлик натижа билан ярим финал босқичига йўл олди.

Учрашувдан кейин ўтказилган матбуот анжуманида «Ҳумо» жамоаси бош мураббийи Евгений Попихин жамоасининг ғалабаси ҳақида тўхталиб ўтди.

«Кескин серийа, ҳақиқий плей-офф. Кўп ҳиссиётлар, тезкор ўйин. Рақибга миннатдорчилик сўзларини айтмоқчиман. Улар ажойиб ўйнашди, жанг қилишди», – дейди жамоа бош мураббийи Попихин.

Ярим финал йўлланмасини нақд қилган «Ҳумо» жамоасини Тошкентга қайтаётган пайтида кўп сонли мухлислар қаторида Ўзбекистон ҳаво йўллари самолёти экипаж командири ҳам ғалаба билан табриклаган. Маълумот учун, клубнинг бугунги кундаги ҳомийлари айнан «Uzbekisatan Airways» ва ERIELL Group саналади. Ярим финалнинг дастлабки иккита баҳси 11-12 март кунлари  Тошкентда «Ҳумо» майдонида бўлиб ўтади.