Қорақалпоғистондаги айрим мактабларда ўқувчиларга сифатсиз озиқ-овқат маҳсулотлари берилгани аниқланди, деб хабар беради Жўқорғи Кенгес матбуот хизмати.

Жўқорғи Кенгес раисининг топшириғига кўра, Кегейли тумани Халқ таълими бўлимига қарашли умумтаълим мактабларида Санитария-эпидемиология бошқармаси ходимлари томонидан текширув ўтказилган. Текширув давомида 1, 8, 19 ҳамда 55-сонли мактабларда бир қанча қўпол хато-камчиликлар аниқланган.

Хусусан, болаларга берилаётган озиқ-овқат маҳсулотлари белгиланган меъёрга жавоб бермаслиги, шунингдек, ичимлик суви билан таъминланмагани, иссиқ чой билан таъминлаш учун эса шароит тўлиқ яратилмагани маълум бўлган.

«Энг ачинарлиси, озиқ-овқат маҳсулотларининг сифати ўрганилганда олма шарбати истеъмолга яроқсиз экани, қадоқланган маҳсулотлар зараркунандалар билан зарарлангани аниқланди», — дейилади хабарда.

Бундан ташқари, маҳсулотлар махсус автомашиналарда эмас, йўловчи транспортида етказиб берилган, турли мактабларда кундалик озиқ-овқат сифатини назорат қилувчи комиссия таркиби тузилмаган.

Ҳозирда ўрганиш жараёнида аниқланган камчиликларни бартараф этиш, айбдорларга чора кўриш бўйича тегишли тартибда ишлар олиб борилмоқда.

Аввалроқ «Юксалиш» умуммиллий ҳаракати Қорақалпоғистон Республикаси ва Хоразм вилоятида тажриба-синов тариқасида бошланғич синф ўқувчиларини бепул овқат билан таъминлаш вазифаси жойига чиққан ҳолда ўрганганди. Аниқланган камчиликларни бартараф этиш мақсадида Қорақалпоғистон Республикаси ХТВ мактабларда бошланғич синф ўқувчиларига бепул овқат бериш 11 ноябрдан бошланишини маълум қилганди. Жараёнлар ҳукуматнинг тегишли низоми бузилиши ортидан ғолиб деб топилган лотлар бекор қилиниши оқибатида кечиккани айтилган.

Шу билан бирга, мактаб ўқувчиларининг дарслик ижара харажатларини бюджетдан қоплаш учун — 400 миллиард сўм ажратилиши ҳам айтиб ўтилганди.

Эслатиб ўтамиз, Шавкат Мирзиёев сайловолди кампанияси пайтида Қорақалпоғистонда 2022 йилдан бошлаб 1–4-бошланғич синф ўқувчилари учун бепул тушлик бериш йўлга қўйилишини маълум қилганди.