Сурхондарё вилоятида масъулияти чекланган жамият раҳбарлари катта миқдордаги кредит маблағларини ўзлаштиргани аниқланди. Бу ҳақда Бош прокуратура ҳузуридаги департамент хабар берди.

Қайд этилишича, «О.Б.» МЧЖнинг раҳбари Р.Ҳ. боғ ташкил этиш ва қишлоқ хўжалиги техникалари сотиб олиш учун ажратилган кредит эвазига ҳудудда боғ ташкил этмасдан, жами 6,1 миллиард сўм маблағни бошқа мақсадларда сарфлаб юборган.

Шунингдек, «Б-Н.» ва «Ч-П.» МЧЖларнинг раҳбари У.Х. ажратилган кредит маблағлар эвазига қўшни Қозоғистондан олиб келинган чорва молларни бошқа шахсларга сотиб юборган. У жами 5,1 миллиард сўм кредит маблағини ўзлаштириш йўли билан талон-торож қилган. Бундан ташқари, фуқаро У.Х. 102,1 миллион сўм қўшимча солиқ ва бошқа мажбурий тўловларни тўлашдан бўйин товлаб келгани аниқланган.

Мазкур ҳолатлар юзасидан Жиноят кодексининг 167-моддаси (Ўзлаштириш, талон-торож қилиш), 181-1-моддаси (Қасддан банкротликка олиб келиш) ва 184-моддаси (Солиқлар, йиғимларни тўламаслик) билан жиноят ишлари қўзғатилиб, тергов ҳаракатлари ўтказилмоқда.

Эслатиб ўтамиз, аввалроқ Самарқанд ва Тошкент вилоятларида имтиёзли кредит маблағларини ўзлаштириш ҳолатлари аниқланганди. Шунингдек, Навоийда 156 миллион сўм имтиёзли кредит маблағларини ўзлаштирган иш юритувчи аниқланган. Ўзбекистоннинг уч вилоятида қарийб 2,5 миллиард сўмлик имтиёзли кредитлар талон-торож қилинганларга жиноят иши қўзғатилган эди.