Uzbekistan Airways Наврўз байрами кунлари — 18 мартдан 22 мартгача маҳаллий авиақатновларнинг эконом ва бизнес класс тарифларига 21 фоизлик чегирма эълон қилди.

Авиакомпания ахборот хизмати раҳбари Камола Икромовага кўра, байрам чегирмасини бошқа турдаги чегирмалар билан бирлаштириш тақиқланади. Қўшимча қилинишича, 2 ёшгача бўлган болалар учун чегирма амал қилмайди, лекин 2 ёшдан 12 ёшгача бўлган болалар учун 25 фоизлик болалар чегирмасига қўшимча равишда 21 фоизлик чегирма тақдим этилади.

Шунингдек, қисман фойдаланилган авиачипта пулини чегирма тугагандан кейинги кунда қайтармоқчи бўлган йўловчи чегирма амал қилган кунда сотиб олган миқдорда қайтариб олади. Тўлиқ фойдаланилмаган ёки қисман фойдаланилган авиачипталарни қайта расмийлаштирганда, агар жўнаш саналаридан бири чегирма тугаган вақтдан кейинга тўғри келмаса, тўлиқ тариф даражасига чегирмалар қўлланилмайди.

Чипталарни авиакомпаниянинг расмий uzairways.com сайти, UzAirways мобил иловаси, Uzbekistan Airways Sales офислари ҳамда авиакомпания агентларидан харид қилиш мумкин.