Олий Мажлис Сенати Кенгашининг мажлисида Сенатнинг ўттиз еттинчи ялпи мажлисини 2 март куни чақириш тўғрисида қарор қабул қилинди. Ялпи мажлис видеоконференцалоқа тарзида бўлиб ўтади.

Ялпи мажлисда «Рақобат тўғрисида»ги, «Тиббиёт ходимининг қонуний тиббий фаолиятига тўсқинлик қилганлик учун жавобгарлик белгиланиши муносабати билан Ўзбекистон Республикасининг Маъмурий жавобгарлик тўғрисидаги кодексига қўшимчалар киритиш ҳақида»ги, «Педагог ходимларнинг хизмат вазифаларини бажаришига тўсқинлик қилганлик учун жавобгарлик кучайтирилиши муносабати билан Ўзбекистон Республикасининг Жиноят кодексига ҳамда Ўзбекистон Республикасининг Маъмурий жавобгарлик тўғрисидаги кодексига қўшимча ва ўзгартишлар киритиш ҳақида»ги, «‘Давлат божи тўғрисида’ги Ўзбекистон Республикаси қонунига қўшимча киритиш ҳақида»ги, «Ўзбекистон Республикасининг Жиноят ҳамда Жиноят-ижроия кодексларига ўзгартиш ва қўшимчалар киритиш тўғрисида»ги, «Молиявий истеъмол кредити бериш тизими такомиллаштирилиши муносабати билан ‘Истеъмол кредити тўғрисида’ги Ўзбекистон Республикаси қонунининг 15-моддасига ўзгартиш киритиш ҳақида»ги, «Давлат органлари билан муносабатларда фуқаролар ва тадбиркорлик субъектлари ҳуқуқларининг самарали ҳимоя қилинишини таъминлаш бўйича қўшимча чоралар кўрилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги ҳамда «Ўзбекистон Республикасининг айрим қонун ҳужжатларига қўшимча ва ўзгартишлар киритиш тўғрисида»ги қонунлар ва масалалар муҳокамаси режалаштирилган.

Шунингдек, сенаторлар Олий Мажлис Сенатининг 2022 йилдаги фаолияти ва 2023 йилга мўлжалланган устувор вазифалари борасидаги масалани кўриб чиқади ҳамда Инсон ҳуқуқлари бўйича Ўзбекистон миллий маркази директорининг мамлакатнинг инсон ҳуқуқлари соҳасидаги халқаро мажбуриятлари бажарилиши ҳолати ҳақидаги ахборотини ҳам эшитади.

Бундан ташқари, ялпи мажлисда Олий Мажлис Сенати Кенгашининг қарорларини тасдиқлаш ҳам назарда тутилган.