Буюк Британия банки Ўзбекистон бозорига кирмоқчи
Инвестициялар, саноат ва савдо вазирлиги 2023 йилнинг 2 март куни Тошкент шаҳрида вазир ўринбосари Сарвар Ҳамидов билан Standard Chartered Bank (Буюк Британия) вакиллари ўртасида учрашув бўлиб ўтгани ҳақида хабар берди.
Маълум қилинишича, учрашувда банкнинг Ўзбекистондаги жорий фаолияти ва мамлакат иқтисодиётининг металлургия, энергетика ва инфратузилмани ривожлантириш каби устувор тармоқларида янги лойиҳаларни амалга оширишга унинг инвестицияларини жалб қилиш истиқболлари муҳокама қилинган.
Томонлар, шунингдек, Standard Chartered Bank’нинг Ўзбекистон бозорида экспортни молиялаштириш бўйича маҳсулотларини илгари суриш ва миллий капитал бозорини ривожлантиришдаги иштирокининг амалий жиҳатларини кўриб чиқди.
Учрашув якунлари бўйича томонлар амалий келишувларга эришиш мақсадида белгиланган ўзаро ҳамкорлик формати доирасида мунтазам алоқаларни давом эттиришга келишиб олди.
Маълумот учун, Standard Chartered Bank 1969 йилда Лондонда ташкил этилган. Асосий фаолиятини Шарқий Осиё ва Африка мамлакатларида олиб боради. 2020 йил охирида унинг молиявий активлари 789,1 миллиард долларни ташкил қилган.
Мавзуга доир: Renault Ўзбекистон бозоридан чиқиб кетади
