Yutong Ўзбекистонга 800 та янги автобус ва электробус етказиб беради
Ўзбекистонга 300 та E12 электр автобуси ва 500 та газда ҳаракатланувчи автобус етказиб берилади. Бу ҳақда Yutong (Хитой) компаниясининг Facebook’даги саҳифасида хабар берилди.
Маълум қилинишича, Чженчжоудаги Yutong New Energy Plant заводида мазкур буюртмаларни етказиб бериш бўйича маросими бўлиб ўтган.
«Тошшаҳартрансхизмат» АЖнинг қайд этишича, ҳозирда Хитойнинг Yutong Bus Co Ltd компанияси ва жамият ўртасида тузилган шартномага асосан, Хитой компанияси томонидан 2023 йилнинг март–май ойларида 12 метрли 500 дона Yutong русумли автобусни ва 12 метрли 300 дона Yutong русумли электробус ишлаб чиқариш ишлари бошланган. 2023 йилнинг март ойи якунига қадар ушбу автобусларнинг 1-партияси, яъни, 110 дона автобус ва 150 дона электробуc Ўзбекистонга етказиб берилиши кутилмоқда.
«Жамоат транспорти тизимини ислоҳ қилиш чора-тадбирлари тўғрисида»ги Президент қарори қабул қилинганди.
Қарорга кўра:
- шаҳар автобус йўналишларида чекланган тарифлар бўйича йўловчилар ташишни брутто-шартнома асосида ташкил этиш ва молиялаштириш тизими босқичма-босқич жорий этилади;
- ташувчилар билан ҳисоб-китоблар «босиб ўтилган йўл» ва «сифат» мезонлари асосида амалга оширилади;
- йўлкира ҳақини кунлик йиғиш режа-топшириғини белгилаш амалиёти бекор қилинади;
- ташувчилар томонидан йўналиш кўрсаткичлари бажарилишини мониторинг қилиш, бажарилган иш ҳажми ва сифатини аниқлаш ҳамда баҳолаш, йўлкира ҳақи тўланишини ва кўрсатилган хизматлар сифатини назорат қилиш учун автоматлаштирилган диспетчерлик бошқаруви ва назорат тизими ташкил этилади.
Маълумот учун, Тошкент шаҳри жамоат транспорти учун 200 та 18 метрлик ва 500 та 12 метрлик табиий газда ишлайдиган автобуслар ҳамда 300 та 12 метрлик электробуслар, Нукус шаҳри ва вилоят марказлари жамоат транспорти учун жами 1000 та табиий газда ишлайдиган автобус харид қилиш бўйича келишувларга эришилган.
Эслатиб ўтамиз, 2022 йил сентябрда йил якунигача яна 25 та ўтириш ва 31 та туриш ўрнига эга бўлган 85 дона SAZ LE-60 ўрта сиғимли автобус ҳам олиб келиниши айтилганди. Улар 2022 йил харид қилинган шу русумдаги 115 дона автобусга қўшилиб, Yutong русумидаги 20 дона электробусдан иборат паркка шу йил янги электробуслар қўшилмаслиги, улар 2023 йилда олиб келиниши маълум қилинган.
