Блинкен ва Лавров Украинада уруш бошлангандан буён илк марта учрашди. Унда қайси масалалар кўтарилган?
АҚШ давлат котиби Энтони Блинкен ва Россия ташқи ишлар вазири Сергей Лавров G20 саммити доирасида юзма-юз суҳбатлашди.
АҚШ Давлат департаментининг исмини ошкор этмаган вакилининг CNN телеканалига айтишича, учрашув режалаштирилмаган ва тахминан ўн дақиқа давом этган. Блинкен журналистларга россиялик ҳамкасби билан тўлақонли икки томонлама музокаралар олиб бориш ниятида эмаслигини айтди.
Россия ТИВ маълумотларига кўра, Блинкеннинг ўзи Лавров билан учрашишни сўраган. Уларнинг учрашуви (Украинада уруш бошланганидан бери илк марта) кутилмаган бўлди ва бу Байден маъмурияти Москва билан мулоқотни давом эттиришга умид қилаётганидан далолат бериши мумкин, дея таъкидлайди The New York Times.
Суҳбат давомида Блинкен учта фикрни билдирди:
- Қўшма Штатлар Украинани «қанча керак бўлса, шунча» қўллаб-қувватлашда давом этади;
- Россия Стратегик ҳужум қуроллари бўйича шартнома (СҲҚШ)ни амалга оширишга қайтиши керак;
- жосусликда айбланган америкалик Пол Уилан Россия қамоқхонасидан озод этилиши керак.
Россия президенти Владимир Путин 21 февраль куни Федерал мажлисга йиллик мурожаатида унинг мамлакати АҚШ билан имзоланган стратегик ҳужум қуролларини қисқартириш бўйича шартномадан чиқишини айтганди. «Агар Қўшма Штатлар ядровий қуролни синовдан ўтказса, биз ҳам буни амалга оширамиз. Ҳеч кимда глобал стратегик вазиятнинг барбод бўлиши мумкинлиги ҳақида қараш бўлмаслиги керак», — дея қўшимча қилди Путин.
Ўз навбатида АҚШ президентининг миллий хавфсизлик бўйича маслаҳатчиси Жейк Салливан Путиннинг Ғарб борасидаги айбловини «бемаънилик» деб атаган. «Ҳеч ким Россияга ҳужум қилмади. Россияга Украина ёки бошқа бирор томондан ҳарбий таҳдид мавжудлиги борасида шунақа бемаъни тасаввур бор», — дейди Салливан.
