Ички ишлар вазирининг биринчи ўринбосари – Тезкор-қидирув департаменти бошлиғи генерал-майор Шуҳратжон Собиров Интерполнинг Ўзбекистондаги Миллий марказий бюроси бошлиғи этиб тайинланди. Бу ҳақда ИИВ матбуот котиби Шоҳрух Ғиёсов Bugun.uz’га хабар берди.

Шуҳратжон Собиров ички ишлар вазирининг биринчи ўринбосари – Тезкор-қидирув департаменти бошлиғи лавозимига тайинлангунига қадар Андижон вилояти Ички ишлар бошқармаси бошлиғи лавозимида ишлаб келган.

Маълумот учун, Интерполнинг Ўзбекистондаги Миллий марказий бюросига 2021 йилдан буён полковник Ғанижон Алимуҳаммедов раҳбарлик қилиб келаётган эди.

Эслатиб ўтамиз, халқаро жиноий полиция ташкилоти — Интерполга 1923 йили асос солинган. Бош қароргоҳи Франциянинг Лион шаҳрида жойлашган. 1949 йилда БМТ томонидан Интерполга ҳукуматга қарашли бўлмаган ташкилот мақоми берилган. Бугунги кунда ташкилотга 195 мамлакат аъзо ҳисобланади.

Ўзбекистон Интерполга 1994 йилда аъзо бўлган ва ИИВ таркибида Интерполнинг Ўзбекистондаги Миллий марказий бюроси ташкил этилган. Бюро раҳбари ички ишлар вазири томонидан тайинланади ва лавозимидан озод этилади.