Мудофаа вазирлиги Туркияда 24 кун давомида зилзила оқибатларини бартараф этишда иштирок этган вазирлик ходимлари Тошкентга қайтиб келгани ҳақида хабар берди.

Шавкат Мирзиёевнинг топшириғига биноан 2023 йилнинг 8 феврал куни Мудофаа вазирлиги ҳарбий хизматчиларидан иборат тиббий отряд зилзилалар оқибатларини бартараф этишда ёрдам бериш ҳамда зилзиладан жабрланганларга тиббий ёрдам кўрсатиш мақсадида Туркияга жўнаб кетганди.

Ўзбекистонлик ҳарбий хизматчилар қарийб бир ой давомида зилзилалардан жабр кўрган турк халқига инсонпарварлик ёрдами кўрсатиб, оғир дамларда қўллаб-қувватлаб, уларга ёрдам берди. Шу вақт давомида улар жами 3860 нафар фуқарога тиббий ёрдам кўрсатди, улардан 1795 нафари эркаклар, 1177 нафари аёллар ва 888 нафарини эса болалар ташкил этмоқда.

«Ислом Каримов номидаги Тошкент халқаро аэропортида 6 март куни Мудофаа вазирлигининг тиббий отряди ходимларини оммавий ахборот воситалари, кенг жамоатчилик вакиллари, мудофаа вазирининг ўринбосари ва бошқа расмийлар кутиб олди», дейилади вазирлик хабарида.

Эслатиб ўтамиз, магнитудаси 7,7 га тенг зилзила 6 февраль тонгида Сурия чегарасидаги Қаҳрамонмараш туманида кузатилганди. Туркия президенти Ражаб Тоййиб Эрдўғоннинг айтишича, ҳалокат 10 та вилоятга таъсир кўрсатган ва сўнгги 84 йил ичидаги энг ҳалокатлиси ҳисобланади. Бундан ташқари, Ўз навбатида Жаҳон соғлиқни сақлаш ташкилоти Туркиядаги кучли зилзиладан омон қолганлар очиқ ҳавода ва «даҳшатли шароитда» қолган бўлиб, бу ер ости силкинишлари оқибатида ҳалок бўлганлар сонига тенг яна шунча қурбонларни юзага келтириши мумкинлигини маълум қилганди.