НАТО разведкаси маълумотларига кўра, россиялик қўшинлар Донецк вилоятидаги Бахмут шаҳри учун жангларда Украинага қараганда беш баробар кўп ҳарбий кучларни йўқотган. Бу ҳақда CNN телеканалига Шимолий Атлантика алянси ҳарбий амалдорларидан бири анонимлик шарти билан маълум қилди.

Телеканал манбаси икки томоннинг йўқотишлари ҳақида аниқ маълумот бермаган. Шу билан бирга, унинг айтишича, бунга қарамай, Украина Бахмутни ҳимоя қилишда ҳамон сезиларли йўқотишларга дуч келмоқда. Январь ойида Der Spiegel немис разведкаси маълумотларига таяниб хабар беришича, Украина армияси шаҳар учун жангларда ҳар куни минглаб аскарларини йўқотаётган.

CNN маълумотларига кўра, Киев Бахмут учун жанглар чоғида Украина томони Россия томонига катта зарар етказганини бир неча бор таъкидлаган. Телеканал 5 март куни Бахмутни ҳимоя қилаётган бўлинмаларга ташриф буюрган Украина қуруқликдаги қўшинлари қўмондони Александр Сирскийнинг Украина Қуролли Кучлари фронтининг ушбу секторида «душманнинг ҳужум салоҳияти пасайган» деган сўзларига таянади.

Бахмут мудофаасини давом эттириш қарорини изоҳлар экан, Украина президенти Владимир Зеленский урушнинг 376-куни якунлари бўйича видеомурожаатида шаҳар «бутун урушдаги энг катта натижалардан бирини бераётганини» айтди.

Эслатиб ўтамиз, Бахмут учун шиддатли кураш 2022 йилнинг июлидан бери давом этмоқда. Россия томонидан «Вагнер» хусусий ҳарбий компанияси ёлланма аскарлари қатнашмоқда, улар сафида маҳбуслар ҳам бор. 2023 йил март ойи бошида ҳарбий компания асосчиси Евгений Пригожин Бахмутнинг «амалда қуршаб олинганини» айтди ва Украина армиясига шаҳарни тарк этишни таклиф қилди.

Владимир Зеленскийнинг айтишича, Украина учун Бахмутни ҳимоя қилиш муҳим, лекин ҳар қандай йўл билан эмас. Унинг сўзларига кўра, Украина Қуролли Кучлари, агар мақсадга мувофиқ бўлса, фронтнинг ушбу секторида жанг қилади.

Украина армияси Бахмутдан «стратегик чекиниши» мумкин деб тахмин қилинган. Америка урушни ўрганиш институти (ISW) экспертлари 3 март кунги ҳисоботида хабар беришича, Украина Қуролли Кучлари, эҳтимол, Россия армияси 2022 йил май ойидан бери босиб олишга уринаётган Бахмутнинг бир қисмидан қўшинларни назорат остида олиб чиқиш учун шароит яратмоқда.

Жума куни (1, 2) эълон қилинган кадрлар Украина Қуролли Кучлари Бахмут ҳудудида иккита муҳим кўприкни вайрон қилганини тасдиқлайди — бири шаҳар шимоли-шарқидаги Бахмутовка дарёсидан ўтган, иккинчиси Бахмут ғарбидаги Хромово қишлоғига олиб борувчи йўлда. Бу орқали Украина Қуролли Кучлари Бахмутнинг шарқий қисмида рус қўшинларининг олдинга силжишига халақит бериш ва уларнинг ғарбга потенциал чекиниш йўлларини чеклаш ҳисобини олаётганини кўрсатиши мумкин, дейди ISW таҳлилчилари.

Аввалроқ АҚШ президенти Жо Байден администрацияси Украина ҳукумати уруш траекториясини ўзгартиришнинг ҳал қилувчи вақти келгани ҳақида огоҳлантирганди. Оқ уй ходимларининг ҳисоблашича, Россия баҳорда ҳужумни бошлайди, Украина эса бой берилган ҳудудларни қайтариш учун контрҳужумга ўтиши мумкин. Кейинги ойлар кескин кечиши ҳақида Украина ҳукуматига январь ойида Киевга келган америкалик амалдорлар маълум қилганди.

Эслатиб ўтамиз, февраль бошларида АҚШ президенти Жо Байден январь ойида МРБ бошлиғи Уильям Бёрнсга Россия ва Украина тинчлик музокараларини ўтказишга қанчалик тайёрлигини баҳолашни топширгани маълум бўлганди. Шунингдек, Россия яқин 10 кун ичида Украинада кенг кўламли ҳужумни бошлаши мумкинлиги айтилган.