Ҳукмрон «Грузия орзуси» партияси ва Грузиянинг парламентдаги бошқа партияларнинг кўпчилиги жамиятда оммавий норозиликларга сабаб бўлган «Хорижий таъсирнинг шаффофлиги тўғрисида»ги қонун лойиҳасини қайтариб олишга қарор қилди.

«Қабул қилинган қонун лойиҳаси жамиятда баҳс-мунозараларга сабаб бўлганини кўриб турибмиз. ‘Ёлғон машинаси’ қонун лойиҳасини салбий томондан тақдим этиб, аҳолининг маълум қисмини чалғитишга муваффақ бўлди. Қонун лойиҳаси ёлғондан ‘Россия қонуни’ деб номланди ва унинг биринчи ўқишда қабул қилиниши жамоатчиликнинг бир қисми назарида Европа йўналишидан чиқиш сифатида тақдим этилди. Бундан ташқари, радикал кучлар ёшларнинг бир қисмини ноқонуний фаолиятга жалб қилишга муваффақ бўлди», дейилади «Рустави 2» иқтибос келтирган томонларнинг қўшма баёнотида.

Маълумот учун, Грузияда бир неча кундан бери «хорижий агентлар» ҳақидаги қонун қабул қилинишига қарши оммавий норозилик намойишлари давом этмоқда. Қонун лойиҳаси мамлакат парламентига икки вариантда киритилган. 7 март куни грузиялик депутатлар «Хорижий таъсирнинг очиқлиги тўғрисида»ги қонун лойиҳасини биринчи ўқишда қабул қилди. Унда Грузияда «хорижий агентлар» реестри пайдо бўлиши кўзда тутилган бўлиб, барча нотижорат юридик шахслар ва чет элдан 20 фоиздан ортиқ маблағ томонидан молиялаштириладиган оммавий ахборот воситалари рўйхати келтирилган.

«Хорижий агентлар тўғрисида»ги қонун лойиҳасининг иккинчи таҳрири — «Чет эл агентларини рўйхатга олиш тўғрисида»ги қонун лойиҳаси бўйича 9 март куни овоз бериш режалаштирилган эди. Мазкур лойиҳага кўра, «хорижий таъсир агенти» мақомини хориждан маблағ олувчи ҳар қандай жисмоний ва юридик шахслар олиши мумкин.

7–8 март кунлари Тбилиси марказида, Руставели проспектидаги парламент биноси яқинида оммавий норозилик намойишлари бўлиб ўтди: намойишчилар парламентга бостириб киришга уринган, полициячиларга тош ва шиша отган, баррикадалар қуришга уринган. Бунга жавобан махсус кучлар намойишчиларга қарши сув зарбалари ва кўздан ёш оқизувчи газ ишлатган. Митингларни тарқатиш натижасида Грузия Ички ишлар вазирлиги 133 кишининг майда безорилик ва полицияга бўйсунмаслик бўйича маъмурий моддалар бўйича ҳибсга олингани ҳақида хабар берди. Яна бир намойишчи полициячига ҳужум қилганликда айбланиб, ҳибсга олинган. У етти йилгача қамоқ жазосига ҳукм қилиниши мумкин.