Хитой ҳукуматига янги раҳбар тайинланди. У Шанхайда дунё бўйича пандемия давридаги энг қаттиқ карантин чекловларига масъул бўлган
Хитой Халқ Республикаси (ХХР) Давлат кенгаши бош вазири — Хитой ҳукумати раҳбари лавозимини Ли Цян эгаллади. Бутунхитой халқ вакиллари кенгаши депутатлари 11 март куни унинг номзодини маъқуллади, Хитой раиси Си Цзинпин эса тайинлаш ҳақидаги фармонни имзолади, дея хабар бермоқда Xinhua.
Ли Цян 2013 йилдан бери ҳукуматни бошқариб келаётган Ли Кэцян ўрнига Хитой Давлат кенгаши бош вазири этиб тайинланган. Собиқ бош вазирнинг иккинчи беш йиллик ваколати 2023 йилда тугади. Хитой қонунчилиги бўйича бош вазир лавозимини икки муддатдан ортиқ эгаллаш тақиқланади.
ХХР ҳукуматини бошқаришдан олдин Ли Цян Шанхай партия қўмитаси котиби лавозимида шаҳарга раҳбарлик қилган. У, айниқса, Хитойда ва бутун дунёда энг қаттиқ бўлган COVID-19 пандемияси даврида шаҳардаги карантин учун масъул эди.
Ли Цяннинг сўнгги 20 йилдаги сиёсий фаолияти Си Цзинпин билан чамбарчас боғлиқ. Сиёсатшунослар Си Цзинпин 10 март куни учинчи беш йиллик муддатга қайта сайланган тарихдаги биринчи раис бўлганидан кейин Ли Цян ҳукуматни бошқаришини кутган. Давлат кенгаши бош вазирларидан фарқли ўлароқ, Хитой президентлари учун икки беш йиллик муддат чеклови олиб ташланди.
