Давлат бюджети даромадлари ижроси 2023 йил феврал ойида 16,1 триллион сўмни ташкил этди. Бу ҳақда Иқтисодиёт ва молия вазирлиги хабар берди.

Маълум қилинишича, бу кўрсаткич 2022 йилнинг мос даврига нисбатан 2,4 триллион сўмга — 17,7 фоиз, 2023 йил январ ойига нисбатан эса 1,2 триллион сўм ёки 8,2 фоиз ошди.

Давлат бюджетидаромадларида солиқ органлари маъмурчилигидаги тушумлар 13,4 триллион сўмни (январ ойига нисбатан 1,5 триллион сўмга — 12,5 фоиз ошди, 2022 йилнинг мос даврига нисбатан эса 1,9 триллион сўм — 16,4 фоизга ошди) ташкил қилди.

Божхона органлари бўйича тушумлар 3,8 триллион сўмни (январ ойига нисбатан 64 миллиард сўмга — 1,7 фоиз ошди, 2022 йилнинг мос даврига нисбатан 519 миллиард сўм — 15,7 фоиз) ташкил қилди.

Шунингдек, февралда ҚҚС тушумлари 5,8 триллион сўмни, ҚҚС манфий қолдиғини қайтариш эса 1,6 триллион сўмни ташкил этган. Январга нисбатан ҚҚС тушумининг камайиши ва ҚҚС қайтарилишининг ортиши ҚҚС нинг ҳисобга олиниши 15 фоиз ставкада, ҳисобланиши эса 12 фоиз ставкада амалга оширилгани билан изоҳланган.

Бюджет даромадларида энг катта улуш берган фойда солиғи бўйича тушумларнинг асосий қисми Навоий ҳамда Олмалиқ кон-металлургия комбинатига тўғри келган — 2023 йил февралда — 47,3 фоиз.

Аввалроқ Ўзбекистонда 2023 йилда давлат бюджети харажатлари қанчани ташкил этиши маълум қилинганди. Шунингдек, Олий Мажлис Қонунчилик палатаси депутати Расул Кушербаев бу сафарги бюджет муҳокамаларида иштирок этмаганини, катта ҳажмдаги лойиҳани ўқишга етарлича вақт берилмаганини маълум қилган эди.