Тошкентда 703 та трансформатор пункти янгиланади
«Тошкент шаҳридаги истеъмолчиларни энергия ресурслари билан барқарор таъминлаш чора-тадбирлари тўғрисида»ги Президент қарори қабул қилинди.
Қарорга кўра, Юнусобод, Шайхонтоҳур, Мирзо Улуғбек, Яшнобод ва Янгиҳаёт туманларида умумий қуввати 664 мегаватт бўлган 5 та 110 киловатт кучланишли подстанция ҳамда 49,6 километр узунликдаги 35 киловатт ва 110 киловатт кучланишли электр узатиш тармоқлари қурилади.
Юнусобод, Мирзо Улуғбек, Олмазор ва Миробод туманларидаги 4 та подстанция реконструкция қилиниб, уларнинг ўтказиш қуввати 179 мегаваттга оширилади.
Эскирган 7,5 километр узунликдаги 35 киловатт ва 41,7 километр узунликдаги 110 киловатт кучланишли электр узатиш тармоқлари замонавий турдаги кабель ва симларга алмаштирилади.
Қарор билан:
2023–2025 йилларда Тошкент шаҳрининг паст кучланишли электр тармоқларини янгилаш дастурининг мақсадли кўрсаткичлари тасдиқланди.
Дастур доирасида жами 2 969,8 километр паст кучланишли электр узатиш тармоқлари ҳамда 703 та трансформатор пункти янгиланади.
Шунингдек, республиканинг бошқа ҳудудларидаги электр тармоқларини ривожлантириш бўйича режалар ишлаб чиқилади.
