Тошкент шаҳрининг собиқ ҳокими Жаҳонгир Ортиқхўжаев бош вазир Абдулла Ариповга маслаҳатчи этиб тайинланмаган. Аввалроқ тармоқларда, хусусан, Telegram’даги Hokim yordamchisi ҳамда Jahon xabarlari каналларида Ортиқхўжаев бош вазирга маслаҳатчи бўлгани ҳақида хабарлар эълон қилинган. Jahon xabarlari Telegram канали маълум вақт ўтиб, хабар фейк эканлиги ҳақида маълумот ёзиб қолдирган.

Бироқ бош вазирнинг матбуот котиби Бекзод Шукуровга кўра, лавозимга тайинлаш маълум бир ҳужжат билан амалга оширилади.

«Лавозим даражасига қараб Президент фармони, қарори ёки Вазирлар Маҳкамасининг қарори, фармойиши чиқиши керак. Ҳозирча бундай ҳужжат мавжуд эмас», — деган у.

Маълумот учун, Шавкат Мирзиёев 16 январ куни бўлиб ўтган йиғилишда ҳокимнинг истеъфога чиқишини маълум қилган эди. «Қиш мавсумига лозим тайёргарлик қилмагани учун Тошкент шаҳри ҳокими Ортиқхўжаевни кечаси штабда ишдан олдим. Қуруқ гап билан, ёлғон ‘сводка’ билан пастга тушмагани учун, ноинсоф, оёғи ердан узилгани учун уни ишдан олдим», — деган давлат раҳбари. Президент Давлат хавфсизлик хизмати ва Бош прокуратурага бугун лавозимидан озод этилган мутасаддиларнинг фаолиятини ўрганиш ва қонун бузилишлари аниқланган тақдирда, қатъий жавобгарликка тортишни топширган.

Шу куни собиқ ҳоким ва унинг оиласи Uzbekistan Airways авиакомпаниясининг Туркиянинг Истанбул шаҳрига кечикиб учган HY-271 рейсига рўйхатдан ўтгани маълум бўлганди. Парвоз 16 январь куни соат 07:40 да амалга оширилиши керак эди. Ҳуқуқ-тартибот идоралари Ўзбекистондан учиб кетмоқчи бўлган Жаҳонгир Ортиқхўжаевни тўхтатиб қолгани айтилди.

Ортиқхўжаевнинг шаҳар кенгаши депутатлиги ваколати муддатидан олдин 27 январ куни тўхтатилган. Марказий сайлов комиссиясининг 30 январдаги қарори билан эса у Олий Мажлис Сенати аъзолари рўйхатидан чиқарилганди.