Коррупцияга қарши курашиш агентлиги давлат органлари ва ташкилотлари ҳамда маҳаллий ҳокимиятларнинг коррупцияга қарши курашиш самарадорлиги рейтингини эълон қилди.

Рейтингга кўра, 62 та давлат ташкилотининг коррупцияга қарши курашиш самарадорлиги 0 баллдан 100 баллгача баҳоланиб, 12 та ташкилот фаолияти «яхши» (81–100 балл), 30 та ташкилот «қониқарли» (55–80 балл) ва 20 та ташкилот «қониқарсиз» (55 баллдан паст) тоифаларга ажратилган.

Таҳлил натижаларига кўра, «қониқарсиз» деб топилган Сурхондарё вилояти ҳокимлиги (11 балл), Сув хўжалиги вазирлиги (13 балл), Андижон вилоят ҳокимлиги (18 балл) ҳамда Энергетика вазирлигида (21 балл) коррупцияга қарши ички назорат тизими самарасиз ташкил этилган.

«Яхши» деб 12 та давлат ташкилоти қайд қилинган. Божхона қўмитасида (87 балл) сунъий интелект ёрдамида ходимларнинг фаолиятини баҳолаш ҳамда коррупция хавфи юқори бўлганлар шахси ҳақида «ахборот портрети»ни онлайн шакллантириш тизими йўлга қўйилган. Солиқ қўмитасининг (93 балл) барча таркибий ҳудудларида ички назорат тузилмалари фаолияти йўлга қўйилган. Яхши натижа қайд этган тижорат банкларида коррупциявий хавф-хатарларни аниқлаш ҳамда камайтиришнинг самарали механизми ташкил этилган.

«Таҳлил натижалари давлат ташкилотлари фаолиятидаги коррупцияга қарши курашиш йўналишида бир қатор камчиликлар мавжудлигини кўрсатади. Раҳбарнинг коррупцияга қарши курашиш бўйича шахсий ташаббуси етарли эмаслиги, жавобгарлик механизмининг белгиланмаганлиги ҳамда самарали коррупцияга қарши курашиш тизимини жорий этиш бўйича эътибор қаратилмаганлиги ташкилотлар фаолияти қониқарсиз баҳоланишига сабаб бўлган», дейилади агентлик хабарида.

Аввалроқ Ўзбекистонда 243 та қонунчилик ҳужжатида коррупциявий омил аниқлагани, мамлакат Коррупцияни қабул қилиш индексида 126-ўринда эканлиги ҳақида хабар берилганди.