Коррупцияга қарши курашиш агентлиги «Тошкент кўприклардан фойдаланиш» унитар корхонаси буюртмачилигида автомобил йўлларини жорий таъмирлаш учун 2023 йил 27 март куни соат 23:35 дан 28 март куни соат 00:44 гача жойлаштирилган эълонлар юзасидан 7 та лот бўйича жами 3 миллиард 625,5 миллион сўмлик давлат харидлари ноқонуний равишда ўтказилганини аниқлади.

Маълум қилинишича, харид комиссияси томонидан фойдаланилган компютер IP-манзиллари маълумотлари ўрганилганида «Давлат харидлари тўғрисида»ги қонуннинг 10, 14 ва 46-моддалари талабларига зид равишда корхона харид комиссияси раиси, аъзолари (овоз бериб баҳолаш ваколатига эга) ва комиссия котиби IP-манзили бир кишига тегишли бўлган компьютер орқали бошқарилиб, харид натижалари баҳоланган ва баённома расмийлаштирилган.

Шунингдек, ушбу давлат харидида иштирок этиб, барчасида ғолиб деб топилган тадбиркор ва бошқа иштирокчиларнинг ҳужжатлари электрон порталга буюртмачи фойдаланган IP-манзил орқали юкланган.

«Мазкур ҳолатлар бўйича харид комиссиясининг баённомасини бекор қилиш тўғрисида буюртмачига тақдимнома юборилди, тўпланган ҳужжатлар Иқтисодий жиноятларга қарши курашиш департаментига ҳамда хизмат текшируви ўтказиш учун Автомобил йўллари қўмитасига сўровнома киритилди.

Агентликнинг тақдимномасига биноан «Тошкент кўприклардан фойдаланиш» унитар корхонаси томонидан 2023 йил 1 апрел куни 7 та лот бўйича харид комиссиясининг баённомалари бекор қилинди», дейилади Антикоррупция агентлиги хабарида.

Аввалроқ Маҳаллабай ишлаш агентлиги тендерларида «уч кунлик фирмалар» ғолиб бўлаётгани аниқлангани, Маҳаллабай ишлаш агентлиги 8,4 миллиард сўмга сайт буюртма қилгани, шу билан бирга, ушбу сайт логотипи ўғирлангани тўғрисида хабар берилганди. Шунингдек, Аксилкоррупция агентлиги давлат харидларидаги коррупцион ҳолатлар ҳақида маълумот берган эди.