Антикоррупция агентлиги директори 2023 йилгача кимлардан ва қандай совғалар олгани очиқланди
Шу вақтгача агентликка 8 та совға келган бўлиб, уларнинг умумий қиймати 14,57 млн сўмни ташкил этган
Коррупцияга қарши курашиш агентлиги ходимлари томонидан 2023 йилга қадар хизмат сафарлари, халқаро ва бошқа расмий тадбирлар муносабати билан қабул қилинган совғалар бўйича реестр шакллантирилди.
Реестрдаги маълумотларга кўра, шу вақтгача 8 та совға келган бўлса, уларнинг барчасини агентлик директори Акмал Бурҳонов қабул қилган ва уларнинг умумий қиймати 14,57 миллион сўмни ташкил этади.
Улардан тўрттаси стол устига қўйиладиган сувенир бўлса, яна тўрттаси деворга осиладиган расмдир. Совғаларнинг энг қиммати Миср Маъмурий назорат идорасидан юборилган стол устига қўйиладиган сувенир бўлиб, унинг қиймати 3,2 миллион сўмни ташкил этади. Афғонистон Коррупцияга қарши курашиш комиссиясининг сувенири қиймати эса 1,35 миллион сўмга баҳоланган.
Деворга осиладиган расмларни эса Озарбайжон Коррупцияга қарши курашиш бош бошқармаси (1,4 миллион сўм), Қозоғистон Коррупцияга қарши курашиш агентлиги директори (1,45 миллион сўм), Тожикистон Давлат молиявий назорати ва коррупцияга қарши курашиш агентлиги (1,6 миллион сўм ва 2,5 миллион сўм) юборган.
