Марказий банк фуқароларни карта транзакциялари билан боғлиқ фирибгарликлардан огоҳлантирди
Регулятор Telegram’даги мазкур хабар ва бот Марказий банкка ҳеч қандай алоқаси йўқлигини қайд этди
Марказий банк фуқароларни карта транзакцияларини бекор қилиш бўйича фуқароларни фирибгарлардан огоҳлантирди.
Маълум қилинишича, шу кунларда айрим фуқаролар уларга Markaziy Bank Uzbekistan номли фойдаланувчи томонидан картадаги маблағлар фирибгарлик йўли билан ечилишининг олдини олиш мақсадида карта транзакцияларини бекор қилиш учун Telegram-ботга кириш лозимлиги юзасидан хабар келганини билдириб, ҳақиқатдан ҳам ушбу бот ва хабар Марказий банкка тегишли эканига аниқлик киритишни сўраб мурожаат қилмоқда.
Марказий банк мазкур хабар ва бот Ўзбекистон Марказий банкига ҳеч қандай алоқаси йўқлигини қайд этди.
«Фуқаролардан ушбу хабарларга эътибор бермаслик ва ҳеч қандай ҳаволага кирмаслик сўралади. Фақат расмий манбаларга таяниш тавсия этилади», дейилади хабарда.
