Ўзбекистонда март ойида автомобил бозорида фаоллик 0,1 фоизга пасайди. Иқтисодий тадқиқотлар ва ислоҳотлар маркази маълумотларига кўра, бир ой давомида жами 123,4 минг дона автотранспорт воситаси сотилган (2022 йилнинг шу даврига нисбатан сотувлар 10 фоизга ошган), бу бир ой аввалгидан 115 донага кам.

Бирламчи ва иккиламчи автомобил бозоридаги вазият

Март ойида сотилган енгил автомобиллар сони 4,7 фоизга камайди ва 110,8 мингтани ташкил этди.

Республикада энг катта пасайиш Навоий — (22 фоиз), Бухоро — (19 фоиз) ва Қашқадарё вилоятларида (18 фоиз) қайд этилди.

Шу билан бирга, 2022 йил март ойига нисбатан енгил автомобиллар савдоси 7,8 фоизга ошди.

Бир ой давомида бирламчи бозорда енгил автомобилларни сотиш 10 фоизга камайди. 2022 йил март ойига нисбатан бирламчи бозордаги пасайиш 16 фоизни ташкил этди.

Шу билан бирга, маҳаллий ишлаб чиқарилган янги енгил автомобиллар савдоси 18,4 минг донани ташкил этди ва 13,8 фоизга камайди.

Иккиламчи автомобил бозорида сотувларнинг пасайиши бирламчи бозорга қараганда камроқ сезилди.

Бир ой ичида 89 минг дона эски енгил автомобиллар сотилган, бу бир ой олдингига нисбатан 3,3 фоизга кам. Ўтган йилнинг шу даврига нисбатан ушбу тоифадаги автомобиллар савдоси 16 фоизга ошди.

Енгил автомобиллар бозори

Хорижда ишлаб чиқарилган янги енгил автомобиллар савдоси сезиларли даражада ошди. Шундай қилиб, бир ой ичида битимлар сони 25 фоизга ошди ва 2,9 минг донани ташкил этди. Шу билан бирга, 2022 йилнинг март ойига нисбатан ўсиш 2,2 бараварни ташкил этди.

Электромобиллар бозори шарҳи

Электромобиллар бозоридаги фаоллик ой давомида сезиларли даражада ошди. Бирламчи бозорда сотувлар 34 фоизга ошган бўлса, иккиламчи бозор 24 фоизга ўсишни кўрсатди.

Умуман олганда, 2023 йилнинг I чорагида йиллик ўсиш 2 бараварга кўпайган ҳолда 2,2 минг дона енгил электромобил сотилган.