Пекин барча мамлакатларнинг суверен мақомини ҳурмат қилади, деди Хитой Ташқи ишлар вазирлиги матбуот котиби Мао Нин. Вазирлик Хитойнинг Франциядаги элчиси Лу Шайнинг Қрим «аслида Россияга тегишли» экани ва собиқ СССР давлатларининг суверенитетини шубҳа остига қўйган интервюсига изоҳ берди.

«Хитойнинг тегишли масала бўйича позицияси ўзгармаган. Ҳудудий суверенитетга келсак, Хитойнинг позицияси доимо аниқ бўлиб келган. Хитой барча мамлакатларнинг суверенитети, мустақиллиги ва ҳудудий яхлитлигини ҳурмат қилади ҳамда БМТ низомининг мақсад ва тамойилларини қўллаб-қувватлайди», — деди ТИВ вакили.

Гап хитойлик дипломатнинг Франциянинг LCI каналига берган интервюси ҳақида кетмоқда. Элчи унда Россия 2014 йилда аннекция қилган Қрим «бошданоқ Россияга тегишли» бўлгани, Никита Хрушчёв эса «совет иттифоқи даврида Қримни Украинага бергани» ҳақида гапириб ўтди. Лу Шай, шунингдек, собиқ СССР мамлакатлари «халқаро ҳуқуқда самарали мақомга эга эмас, чунки уларнинг суверен давлат сифатидаги статусига таъсир кўрсатадиган халқаро шартнома йўқ», дея таъкидлади. У постсовет чегаралари масаласида «баҳс»ларни тўхтатишга чақирган.

Хитой элчисининг сўзлари Латвия, Литва, Эстония ва Украина расмийларининг кескин муносабатига сабаб бўлди.

Украинанинг Франциядаги элчиси Вадим Омелченко, ўз навбатида, ХХР элчисида ё «география билан боғлиқ аниқ муаммолар бор», ёки унинг баёноти расмий Пекиннинг «Украинада халқаро ҳуқуқ, БМТ низоми мақсадлари ва принциплари асосида тинчлик ўрнатиш бўйича саъй-ҳаракатлари» борасидаги позициясига зид келишини таъкидлаган.

Bloomberg’нинг қайд этишича, Хитойнинг Франциядаги элчихонаси ўзининг WeChat аккаунтида элчи билан суҳбат стенограммасини ўчириб ташлаган. Суҳбат элчихонанинг расмий сайтида чоп этилмаган.

Элчининг Қрим ҳақидаги сўзлари дунё матбуотида катта резонансга сабаб бўлди

Wall Street Journal:

«Бу баёнот Хитойнинг феврал ойида тақдим этилган Украинани тинч йўл билан тартибга солиш режасининг ‘барча катта ва кичик давлатларнинг суверенитети, мустақиллиги ва ҳудудий яхлитлигини’ни қўллаб-қувватлашга қаратилган тамойилига путур етказади».

The Guardian:

«Лу Шайнинг сўзлари Франция президенти Макроннинг Россия ва Украина ўртасида воситачи бўлган Хитойга ишончи борасида янги саволлар туғдиради».

Politico:

«Хитой элчисининг сўзлари билан боғлиқ можаро Европа Иттифоқи ташқи ишлар вазирларининг Люксембургдаги учрашуви олдидан содир бўлди, унда бошқа масалалар қаторида Европа давлатлари ва Пекин ўртасидаги муносабатлар муҳокама қилинади».