Самарқанд аэропорти Европанинг йирик авиакомпаниялари билан рейслар очиш бўйича музокаралар олиб бормоқда. Бу ҳақда Air Marakanda бош директорининг алоқалар бўйича ўринбосари Мария Шаравина журналистларга маълум қилди.

Ҳозирда Самарқанддан Европага рейслар мавжуд эмас.

«Биз Европанинг йирик авиакомпаниялари билан қитъа давлатларидан Самарқандга авиақатновлар очиш бўйича музокаралар олиб бормоқдамиз. Бундан ташқари, яқин келажакда бизнинг янги базавий авиаташувчимиз Air Samarkand Европага ҳамда Яқин Шарқ ва Жануби-Шарқий Осиё мамлакатларига рейслар қўйиши режалаштирилган», — деди у.

Шаравина йил бошидан буён аэропорт Россия шаҳарларига ҳам парвозлар дастурини сезиларли даражада оширганини, хусусан, Қозон, Уфа, Сочи, Самара, Минералние Водига тўғридан-тўғри рейслар очилганини таъкидлади. Санкт-Петербург, Новосибирск, Москвага парвозлар сони кўпайтирилди. Шунингдек, 21 апрел куни Россиянинг «Победа» лоукостери Москвадан илк парвозини амалга оширди, у ҳафтасига икки марта Самарқандга парвоз қилишни режалаштирмоқда.

Аввалроқ Хитойнинг China Southern Airlines авиакомпанияси Пекин ва Тошкент ўртасида тўғридан-тўғри мунтазам қатновларни тиклаётгани ҳақида хабар берилганди. Шунингдек, Туркиянинг Turkish Airlines авиакомпанияси Истанбулдан Бухорога мунтазам авиарейслар йўлга қўйиши, Озарбайжондан Самарқандга авиақатновлар йўлга қўйиши ҳақида маълум қилинганди.