Президент администрацияси раҳбари ўринбосари Комил Алламжонов, шўба мудири Саида Мирзиёева ва мактабгача ва мактаб таълими вазири Ҳилола Умарова UNICEF’нинг Ўзбекистондаги ваколатхонаси раҳбари Мунир Мамадзаде ва халқаро ташкилотлар экспертлари билан учрашди. Бу ҳақда Саида Мирзиёева ўзининг Telegram саҳифасида ёзиб қолдирди.

Учрашувда Ўзбекистонда сифатли мактаб таълимидан фойдаланиш имкониятларини кенгайтириш ва барча болалар, жумладан, ижтимоий ҳимояга муҳтож болалар учун тенг имкониятларни таъминлаш бўйича UNICEF ва UNESCO’нинг қўшма лойиҳаси муҳокама қилинган.

Мирзиёевага кўра, халқаро ташкилотлар таълим соҳасини ривожлантириш бўйича илмий тадқиқотлар олиб боради ва мавжуд бешта муаммоли йўналиш бўйича вазиятни яхшилаш стратегиясини ишлаб чиқади.

Жумладан, мактаб инфратузилмасини модернизация қилиш, инклюзив ўқув-услубий материаллари ишлаб чиқиш ва тақдим этиш ҳамда ўқитувчиларнинг малакасини ошириш кўзда тутилган.

«Мактабгача ва мактаб таълими вазирлиги ва халқаро ташкилотлар билан биргаликда катта тадқиқот ўтказилди. Мавжуд муаммоларга аниқ диагноз қўйиб, унинг ечими бўйича аниқ стратегия ва молиялаштириш манбалари белгиланганди», — деб ёзади Комил Алламжонов.

Шунингдек, у барча халқаро ташкилотлар — UNICEF, UNESCO, USAID ва Жаҳон банкига Ўзбекистон таълим тизимига бефарқ бўлмагани учун миннатдорлик билдирган.

«Умид қиламанки, биз ҳамкорликда, албатта, сифатли таълим тизимини яратишга муваффақ бўламиз», — дея постини якунлаган Алламжонов.