Ўзбекистонда Халқаро тижорат суди фаолияти йўлга қўйилади
Мирзиёев инвесторларнинг мамлакатдаги ютуқларини шахсан кафолатлашга тайёрлигини билдирди
Шавкат Мирзиёев Халқаро конгресс марказида бўлиб ўтган иккинчи Тошкент халқаро инвестиция форумининг ялпи мажлисида нутқ сўзлагани ҳақида хабар берилганди.
«Мен хорижий компаниялар ва тадбиркорлар билан кўпроқ мулоқот қилишга интиламан. Сизларнинг ғоя, таклиф ва ташаббусларингиз менга куч-ғайрат беради, янги ислоҳотларга ундайди. Шу боис, янги-янги инвесторлар билан тез-тез учрашувлар ўтказишга, сизларнинг юртимиздаги ютуқларингизни шахсан кафолатлашга тайёрман», — деди Президент.
Қайд этилишича, инвесторлар ҳуқуқларини суд орқали кафолатли ҳимоя қилиш борасида катта қадамлар қўйилмоқда.
Бундан буён, тадбиркор ва инвесторлар судда ўз талабининг тўғрилигини исботлаши шарт эмас. Энди давлат идораси ўз қарорининг қонунийлигини исботлаб беришга мажбур бўлади. Юзага келган ҳар қандай ноаниқликлар эса инвесторлар фойдасига ҳал қилинади.
Қонунларда халқаро арбитраж судлари қарорларини мажбурий ижрога қаратиш механизмлари мустаҳкамлаб қўйилди.
«Жорий йилда ҳам тадбиркорлар ҳуқуқини ҳимоя қилиш бўйича ислоҳотларимиз давом эттирилади. Жумладан, халқаро экспертлар кўмагида тарихимизда илк бор Халқаро тижорат суди фаолияти йўлга қўйилади», — деди давлат раҳбари.
Аввалроқ Президент Жаҳон савдо ташкилоти талаблари Ўзбекистондаги ислоҳотлар мазмунига тўла мос келиши ва ушбу ташкилотга тезроқ аъзо бўлиб киришдан манфаатдорлигини айтганди.
