Ўзбекистон олтин қазиб олишни 1,5 баробарга ошириб, йилига 150 тоннага етказиш ниятида. Бу ҳақида тоғ-кон саноати ва геология вазирининг биринчи ўринбосари Аъзам Қодирхўжаев маълумот берди.

Ҳозирда Ўзбекистон йилига 105 тоннага яқин олтин қазиб чиқаради ва жаҳонда энг йирик олтин қазиб чиқарувчилардан бири ҳисобланади.

Statista маълумотларига кўра, 2022 йилда республика конларида 100 тоннага яқин олтин қазиб олинган. Сўнгги ўн йил ичида Ўзбекистонда олтин қазиб олиш 90 тоннадан 104 тоннагача кўтарилди.

Бутунжаҳон олтин кенгаши (WGC) берган ҳисоботларига таяниб, Forbes тақдим этган маълумотларга кўра, 2020 йилда Ўзбекистон 101,6 тонна олтин қазиб олди ва олтин қазиб олиш бўйича дунёнинг етакчи 10 та давлатига кирди.

Шунингдек, Бутунжаҳон олтин кенгаши (WGC) 2022 йилда Ўзбекистон Марказий банки олтин захираларини 34 тоннага оширганини маълум қилди.