11:04 | 09.05.23 3086

Шавкат Мирзиёев Кремлда Владимир Путин билан учрашди

Учрашув аввалида икки мамлакат етакчилари Иккинчи жаҳон урушидаги ғалабанинг 78 йиллиги муносабати билан бир-бирини қутлаган

Шавкат Мирзиёевнинг Москва шаҳрига амалий ташрифи доирасида 8 май куни Кремлда Россия президенти Владимир Путин билан учрашув бўлиб ўтди.

Суҳбат аввалида икки мамлакат етакчилари Иккинчи жаҳон урушидаги ғалабанинг 78 йиллиги муносабати билан бир-бирини самимий қутлаб, фахрийлар, дўст халқларга тинчлик, фаровонлик ва равнақ тилади.

Россия президенти давлат раҳбарини Ўзбекистон Конституциясига ўзгартиришлар киритиш бўйича умумхалқ референдуми муваффақиятли ўтказилгани билан табриклади.

Учрашувда Ўзбекистон—Россия кенг қамровли стратегик шериклик ва иттифоқчилик муносабатларини янада мустаҳкамлаш масалалари кўриб чиқилди. Шунингдек, устувор йўналишлардаги кўп қиррали амалий ҳамкорликни кенгайтиришга алоҳида эътибор қаратилган. Икки мамлакат етакчи корхона ва компанияларининг жорий ва истиқболли кооперация лойиҳаларини, шу жумладан Ҳукуматлараро комиссия фаолияти доирасида қўллаб-қувватлаш муҳим экани таъкидланган.

Ўтган ойда Тошкент шаҳрида ўтган «Иннопром» халқаро саноат кўргазмасининг самарали натижалари юқори баҳоланди. Ўзаро товар айирбошлаш суръатини таъминлаш бўйича мувофиқлаштирилган чораларни кўриш зарурлиги қайд этилди. Ўзбекистон ва Россия ҳудудлари даражасидаги фаол мулоқотлар қўллаб-қувватланди.

Бундан ташқари, томонлар жадал маданий-гуманитар алмашинувни давом эттиришдан, жумладан, соғлиқни сақлаш, фан ва таълим, маданият ва санъат соҳаларида тадбирлар ўтказишдан манфаатдор эканини билдирди.