Хотира ва қадрлаш куни муносабати билан Киночилар уйида Кинематография агентлиги буюртмасига биноан Cinema of Central Asia студияси томонидан суратга олинган «Ўзбек қизи» бадиий фильмининг илк катта премераси бўлиб ўтди.

Ушбу фильмда Иккинчи жаҳон уруши йилларида иштирок этган ўзбек қизларининг жанг майдонларида кўрсатган қаҳрамонликлари бош қаҳрамон Жамила образи орқали гавдалантирилган.

Фильм сценарий муаллифлари Бахтиёр Абдуғофур, Игор Костейченко ва Мансур Абдухолиқов, постановкачи режиссор Акбар Бектурдиев, операторлар Ҳусан Алижонов ва Максим Куровский, монтаж устаси Хуршид Алихўжаев, бош продюсер Фирдавс Абдухолиқов.

Фильмда ролларни Айсанем Юсупова, Феруза Саидова, Йигитали Мамажонов, Олег Тактаров, Сергей Лапаницин, Милана Иванова ва бошқалар ижро этган.

Агентлик ташаббуси билан 9 май, сешанба куни Ўзбекистон қатор телеканалларида «Ўзбек қизи» фильмининг илк миллий телевизион премераси бўлиб ўтади. Филмнинг телеканаллардаги премера вақти қуйида келтирилган.

• «Ўзбекистон» телеканали — соат 18.50да;
• «Ёшлар» телеканали — соат 19.30да;
• «Тошкент», «Маданият ва маърифат», «Дунё бўйлаб», «Маҳалла», «Ўзбекистон тарихи», «Кинотеатр» телеканалларида — соат 19.00да;
• «Дастурхон» ва BizTV телеканалларида — соат 20.00да;
• Zo‘r TV — соат 22.00да;
• Sevimli — соат 22.30да;
• MY5 — соат 22.45да