Номаълум шахс қизлар ётоқхонаси олдида беҳаё ҳаракатлар қилди
Қонунбузарлик талабалар томонидан тасвирга олинган
Тошкентда номаълум шахс университет ётоқхонаси олдида беҳаё ҳаракатлар қилди. Аниқланишича, қонунбузарлик ётоқхонанинг қизлар яшайдиган қисмида содир бўлган ва талабалар томонидан тасвирга олинган. Ҳолат юзасидан Тошкент шаҳар ички ишлар бошқармаси баёнот берди.
Жорий йилнинг 24 май куни тахминан соат 15:00 ларда Учтепа туманида жойлашган олийгоҳлардан бирининг қизлар учун мўлжалланган ётоқхонаси олдида, 1961 йилда туғилган фуқаро жамиятда юриш-туриш қоидаларини қасддан бузиб, майда безорилик содир этган. Кўрилган чора-тадбирлар натижасида ушбу фуқаро ички ишлар органлари ходимлари томонидан ушланган.
Мазкур ҳолат юзасидан Учтепа тумани ИИО ФМБ томонидан фуқарога нисбатан Маъмурий жавобгарлик тўғрисидаги кодекснинг 183 моддаси (майда безорилик) билан маъмурий баённома расмийлаштирилган ҳамда Жиноят ишлари бўйича Учтепа тумани суди томонидан унга нисбатан 15 сутка маъмурий қамоқ жазоси тайинланган.
