Қўшнисининг 11 ёшли қизига тегажоғлик қилган эркак қўлга олинди
Гумонланувчи терговдан яшириниши мумкинлиги инобатга олиниб, қамоққа олиш эҳтиёт чораси қўлланилган
Тошкент шаҳри Яшнобод туманида яшовчи эркак ўзи яшайдиган «дом»нинг кириш йўлагида қўшнисининг 11 ёшли қизига нисбатан уятсиз, бузуқ ҳаракатлар қилгани аниқланди. Бу ҳақдаги хабарни Бош Прокуратура ахборот хизмати рахбари Ҳаёт Шамсутдинов тасдиқлади.
Аниқланишича, 1969 йилда туғилган эркак 16 ёшга тўлмаган шахсга нисбатан уятсиз, бузуқ ҳаракатлар қилиш жиноятини содир этганликда гумон қилиниб, ушланган. Яъни, у ўзи яшаётган уйнинг кириш йўлагида 11 ёшли қизнинг қаровсиз юрганини кўриб, унинг иккала елкасидан қўллари билан ушлаб, юз ва лабларидан ўпиб, орқа қисмидан ушлаб, унга нисбатан уятсиз-бузуқ ҳаракатлар қилган.
Олиб борилган тергов жараёнида эркак Жиноят процессуал кодексининг 227-моддаси тартибида ушланиб, унга нисбатан 129-моддаси 2-қисми (ўн олти ёшга тўлмаган шахсга нисбатан уятсиз-бузуқ ҳаракатлар қилиш) билан жиноят иши қўзғатилган. Ҳозирда тергов олиб борилмоқда.
Маълумот ўрнида, ушбу модда билан айбдор деб топилган шахс 3 йилдан 5 йилгача озодликни чеклаш ёхуд уч йилдан беш йилгача озодликдан маҳрум қилиш билан жазоланади.
