Хўжандда муддатли ҳарбий хизматни ўтаётган аскарлар калтакланган
Полковник ва беш нафар ҳарбий хизматчи қамоқ жазосига ҳукм қилинди
Жорий йил баҳорида ижтимоий тармоқларнинг тожик сегментида муддатли ҳарбий хизматни ўтаётган аскарлар калтаклангани акс этган тасвирлар тарқалган, гумонланувчилар ҳибсга олинган эди. Тожикистон Олий суди ҳарбий коллегияси томонидан жиноятда гумонланган полковник ва 5 нафар ҳарбий хизматчи қамоқ жазосига ҳукм қилинди.
Хўжанд гарнизони Ҳарбий коллегияси маъсул ҳодими олти гумонланувчининг барчаси 30 май куни судлангани ҳақидаги хабарни тасдиқлади. Бироқ, маъсул ҳодим батафсил маълумот беришдан тийилиб, Тожикистон Олий суди Ҳарбий коллегияси судяси Матин Бобозода чиқарган ҳукмга ишора қилган ҳолос.
Беш нафар ҳарбий хизматчи «аскарлар ўртасида бўйсуниш муносабатлари мавжуд бўлмаган тақдирда ўзаро муносабатларнинг қонун ҳужжатларида белгиланган қоидаларини бузганлик» да айбланган.
Судга жиноят вақтида биринчи Ворух комендатурасининг бошлиғи бўлган подполковник Нузҳат Лазуриев ҳам келди. Унга нисбатан Жиноят кодексининг 391-моддаси 3-қисми «б» банди билан айблов қўйилди.
Хўжанд гарнизони Ҳарбий коллегиясидаги иккинчи манба исм-шарифини айтмаган ҳолда подполковник Нузҳат Лазуриев ва сержант Жонибек Қосимзода 11,6 йилга, яна тўрт нафар ҳарбий хизматчи эса 9,6 йилга озодликдан маҳрум этилганини айтди.
Аскарларнинг калтаклангани акс этган видео 2022 йил охирида Тожикистон чегара қўшинлари бўлинмаларидан бирида суратга олинган, бироқ ижтимоий тармоқларда баҳорги чақирув даврида эълон қилинган эди.
