Шавкат Мирзиёев Ражаб Тоййиб Эрдўғоннинг инаугурациясига боради
Инаугурация маросимида дунёнинг 70 дан зиёд мамлакатидан давлат ва ҳукумат раҳбарлари иштирок этиши кутилмоқда
Президент Шавкат Мирзиёев Туркияга сафар қилади. Президент матбуот хизматининг хабар беришича, Шавкат Мирзиёев Туркия президентлигига қайта сайланган Рaжaб Тoййиб Эрдўғоннинг инаугурациясига ташриф буюради.
Ўзбекистон Республикаси Президенти Шавкат Мирзиёев Туркия Республикаси Президенти Ражап Тоййип Эрўдғоннинг таклифига биноан 3 июн куни Анқара шаҳрида Туркия Президентининг лавозимга киришиши муносабати билан тантанали тадбирларда иштирок этади.
Хабарда қўшимча қилинишича, тадбир мартабали меҳмонлар, давлат раҳбарлари ва кўплаб сиёсий лидерлар иштирокида ўтиши айтилган.
Ташкилотчилар қайд этишича, инаугурация маросимида дунёнинг 70 дан зиёд мамлакатидан давлат ва ҳукумат раҳбарлари, расмий делегациялар ва олий мартабали меҳмонлар иштирок этиши кутилмоқда.
