Абитуриент ОТМга ҳужжат топшириш учун қанча тўлаши маълум бўлди
Базавий ҳисоблаш миқдорининг 50 фоизи (165 минг сўм) миқдорида тўлов қилинади
Бу йилги қабул учун абитуриентлар тўлаши керак бўлган миқдор 165 минг сўм этиб белгиланди. Билим ва малакаларни баҳолаш агентлиги ходимлари «Абитуриент» кўрсатувида шу ва шунга ўхшаш кириш имтиҳонларига оид саволларга жавоб берди.
«Абитуриентлар тест синовида иштирок этиш учун базавий ҳисоблаш миқдорининг 50 фоизи миқдорида тўлов қилишади. Май ойидан БҲМ миқдори 330 минг сўм этиб белгиланган ва абитуриентлар бунинг ярмини – 165 минг сўм миқдорида тўлов қилади», деб маълумот берди агентлик ходими Жамшидбек Одилов.
Тестда қатнашиш учун тўлов қилмайдиган абитуриент тоифалари ҳам маълум қилинди. Буларга:
- ўқишни тест ўтказилаётган йилда тамомлаган битирувчилар;
- ногиронлиги бўлган абитуриентлар;
- меҳрибонлик уйи болалари;
- болалар шаҳарчасининг битирувчилари;
- «Ижтимоий ҳимоя ягона реестри» ахборот тизимида рўйхатга олинган шахслар ва уларнинг фарзандлари;
- «Ёшлар дафтари»да рўйхатда турувчи ёшлар киради.
Маълумот ўрнида, абитуриентларни рўйхатга олиш 20 июндан 20 июлгача (шу куни ҳам) амалга оширилади. Чет тилидан ижодий имтиҳон ўтказиладиган йўналишлар учун қабул 10 июлда якунланади.
