Anhor-Lokomotiv боғида икки киши аттракциондан тушиб кетди
Улар учиш чоғида хавфсизлик камарларини тақмаган
Шайхонтоҳур туманидаги истироҳат боғида икки нафар шахс аттракциондан тушиб кетди. Бу ҳақда Миллий гвардия матбуот хизмати хабар қилди.
Маълум қилинишича, 12 июн куни соат тахминан 22:10 лар атрофида Шайхонтоҳур туманида жойлашган Anhor-Lokomotiv кўнгилочар боғида 24 ёшли эркак (Б.Э.) ва 30 ёшли аёл (Т.М.) ушбу боғда жойлашган «Мельница» номли аттракционга чиққанида хавфсизлик камарларини тақмаган. Бунинг оқибатида икки шахс ҳам учиш чоғида аттракциондан тушиб кетган.
Мазкур боғда хизмат олиб бораётган Миллий гвардия ҳарбий хизматчилари зудлик билан воқеа жойига етиб келиб, тез ёрдам келгунга қадар уларга биринчи тиббий ёрдам кўрсатган. Фуқаролар Чилонзор туманида жойлашган Республика тез тиббий ёрдам илмий марказига олиб кетилган.
Ҳурматли фуқаролар, кўнгилочар боғлар ҳудудида хавфсизлик қоидаларига риоя этишни ёдингиздан чиқарманг. Айниқса, аттракционларда учаётган пайтингиз йўриқномаларга амал қилган ҳолда, хавфсизлик камарлари тақилганлигини текшириб кўришни унутманг, — дейилади хабарда.
