Саида Мирзиёева Сурхондарё вилояти Ангор туманидаги 9-мактабга бориб, у ердаги ҳолат билан танишди. Бу ҳақида ўзининг Telegram каналида маълумот берди.

«Афсуски, чекка ҳудудлардаги айрим мактабларимизнинг аҳволи ниҳоятда аянчли. Мен Ангор туманидаги 9-мактабни кўздан кечириб, бунга яна бир бор ишонч ҳосил қилдим. Бу ерда энг бирламчи шароитлар ҳам йўқлиги, коммуникация, мактаб жиҳозлари, ҳаттоки ўқувчилар учун жой етарли эмаслигини кўриш мен учун оғриқли бўлди.»

Унинг сўзларига кўра, мактабларга эҳтиёж мунтазам равишда ошиб боряпти. Туғилишлар сони йилдан йилга кўплиги учун ҳам баъзи мактабларда битта синфда 40 тагача ўқувчи ўтиргани ҳам ҳақиқат. Лекин бу муаммоларни ҳал этмасликнинг иложи йўқ, ўқувчиларга шароит яратмасдан туриб, таълим сифатида ҳақида гапириш бефойда.

Таъкидланишича, бошланғич синфлар учун замонавий ўқитиш тизими шу йил сентабр ойидан жорий этиляпти. Инглиз тилини ўргатиш учун хориждан чет тили мутахассислари олиб келиняпти, мактаблар учун замонавий жиҳозлар ажратиляпти. Булар ушбу йўналишдаги ишларнинг ҳаммаси эмас.