Тошкент вилояти Зангиота туманида Damas ва Spark иштирокида ЙТҲ содир бўлди. Бу ҳақида Тошкент вилояти ИИБ Ахборот хизмати маълум қилди.

Маълум қилинишича, 2023 йилнинг 9 июн куни M-34 Тошкент-Душанбе автомобил йўлининг Зангиота туман ҳудудидан кесиб ўтган қисмида ҳаракатланаётган Spark ўзига қарама-қарши йўналишда кетаётган Damas’га тўқнашиб, ЙТҲ содир этган.

Бунинг оқибатида Spark ҳайдовчиси воқеа жойида вафот этган. Шунингдек, яна 8 нафар ҳодиса иштирокчилари турли тан жароҳатлари билан шифохонага ётқизилган. Уларнинг ҳаётини сақлаб қолиш учун 20 га яқин шифокорлар жалб қилинган.

8 нафар шахснинг 4 тасида шок ҳолати кузатилган ва 3 та беморда операция муолажалари ўтказилган. Ҳозирда барча беморнинг аҳволи стабил ҳолатда.

Ушбу тўқнашув натижасида яна Matiz ва Spark русумли транспорт воситаларига ҳам техник шикаст етган. Ҳозирда ушбу йўл-транспорт ҳодисаси юзасидан тергов ҳаракатлари олиб борилмоқда.