Ижтимоий тармоқда поезд «Жигули»ни уриб кетгани ҳақида хабарлар тарқалди. Ҳолат юзасидан ИИВ Транспорт ва туризм объектларида хавфсизликни таъминлаш департаменти маълумот берди.

21 июн куни соат 08:10 ларда «Термиз-Сариосиё» шаҳарлараро қатновчи йўловчи поезди «Қумқўрғон-Элбаян» темир йўл бекатлари оралиғида кетаётган вақтида ушбу бекатларнинг қўриқланмайдиган кесишмасидан 67 ёшли шахс ўзига тегишли бўлган ВАЗ-2107 автомашинасида ўтган.
Ҳайдовчининг эҳтиётсизлиги оқибатида поезд машинани уриб юборган.

«Тан жароҳати олганлар йўқ. Йўловчи поезди соат 08:12 да тўхтаб, соат 08:50 да ўз ҳаракатини давом эттирди», — дейилади хабарда.