150 минг сўм қарзни тўламаганлик учун 300 минг сўм жарима солиш адолатдан эмас — Танзила Нарбаева
Сенат ижро ҳужжатларини ижро этмаганлик учун солинадиган маъмурий жарима миқдорини қайтадан кўриб чиқди
Сенатнинг 42-ялпи мажлисида «Ижро ҳужжатларини ижро этмаганлик учун солинадиган маъмурий жарима миқдорини белгилаш тартиби такомиллаштирилиши муносабати билан Ўзбекистон Республикасининг Маъмурий жавобгарлик тўғрисидаги кодексига ўзгартиришлар ва қўшимча киритиш ҳақида»ги Қонун муҳокама қилинди.
Ҳозирда, ижро ҳужжати бўйича қарздор шахс қарздорликни ўз вақтида тўламаса, МИБ томонидан:
- фуқароларга нисбатан БҲМнинг 1 бараваридан 5 бараваригача (330 минг сўмдан 1 млн 650 минг сўмгача);
- мансабдор шахсларга 5 бараваридан 10 бараваригача (1 млн 650 минг сўмдан 3 млн 300 минг сўмгача) жарима қўлланилади.
Ҳужжатларда қарздор тўлаши керак бўлган сумма жариманинг энг кам миқдоридан кам бўлса ҳам, жарима миқдори ўзгармайди. Бу эса, қарздорларнинг шикояти кўпайишига сабаб бўлаётгани айтилди.
Сенатда муҳокама қилинаётган қонун ва Маъмурий жавобгарлик тўғрисидаги кодексга қўлланиладиган жариманинг миқдори ижро ҳужжатида ундирилиши белгиланган суммадан юқори бўлмаслиги ҳақида норма киритилди.
150 минг сўм қарзни тўламаганлик учун 300 минг сўм жарима солиш – бу адолатдан эмас, деди Танзила Нарбаева.
Сенат Раиси томонидан, бундай амалиёт янги конституциявий қоидага мутлақо зидлиги айтилди. Қонун сенаторлар томонидан маъқуллангани маълум қилинди.
