Наманганда табиатга 300 млндан ортиқ зарар келтирган эркак 2 йилга уй қамоғига олинди
У 4 туп қимматбаҳо садақайрағоч дарахтини кесиб ташлаган.
Наманган туман Экология бўлими инспекторлари 2 март куни туманнинг «Ўлмас» маҳалла ҳудудида профилактик қўшма рейд ўтказиб, рейд давомида фуқаро Б.М. томонидан ёши 100 йилдан кам бўлган 4 туп қимматбаҳо садақайрағоч дарахти кесиб юборилганлиги аниқланган.
Эркак дарахтларни кесиб, ўсимлик дунёсига 326 850 000 сўм миқдорида зарар етказган.
Туман прокуратураси томонидан Б.М.га оид иш ҳужжатлари ўрганилиб, жиноят иши қўзғатилган. Жиноят ишлари бўйича Наманган туман судида ўтказилган сайёр суд мажлисида Б.М. Жиноят Кодексининг 198-модда 2-қисми билан айбдор деб топилиб, унга нисбатан 2 йил муддатга озодликни чеклаш жазоси тайинланган.
Бундан ташқари, эркак вилоят Экология бошқармаси фойдасига ўсимлик дунёсига етказилган 326 850 000 сўм зарарни ундириш белгиланган.
