Жаҳон олтин кенгашининг маълумотига кўра, Ўзбекистон май ойида 11 тонна олтин сотиб, экспортини $1,3 миллиардга етказиб, дунёда олтин сотувчи мамлакатлар ичида иккинчи ўринга чиқиб олди. Ўзбекистон Марказий банки май ойида олтин захиралари жисмоний жиҳатдан 9 тоннага ва эквивалентида қарийб $1 миллиардга камайганини қайд қилганди.

Ўзбекистон кейинги кўрсаткичдаги Қозоғистон ва Германиядан 5,5 баробар кўп олтин сотган.

Олтин сотиш бўйича биринчи ўринни Туркия эгаллаган. У май ойида 63 тонна тилла сотиб, мутлақ етакчига айланган. Туркия олтин-валюта захираларининг фаол сотилиши мамлакат Марказий банки миллий валютани сунъий равишда қўллаб-қувватлаш борасидаги сиёсати билан боғлаш мумкин.

Полша май ойида олтиннинг асосий харидорига айланди — 19 тонна. Иккинчи ўринда 16 тонна билан Хитой жойлашган. Ундан кейин Сингапур, Россия, Ироқ, Ҳиндистон, Чехия ва Қирғизистон — тўрт тоннадан ортиқ эмас.

Кенгашнинг қайд қилишича, жаҳон марказий банкларининг олтин-валюта захиралари 27 тоннага камайиб, апрел ойи билан солиштирганда, қимматбаҳо металлар савдоси икки баравардан кўпроқ камайган.

Аввалроқ Ўзбекистон олтин қазиб олиш ҳажмини йилига 150 тоннага етказишни режалаштираётгани, Ўзбекистоннинг Мурунтов олтин кони жаҳон етакчилари орасида иккинчи ўринни эгаллагани ҳамда Озарбайжон Ўзбекистонда олтин конларини ўзлаштириши ҳақида хабар берилганди.