Total Energies Марказий Осиё минтақасидаги ваколатхонасини Тошкентда очмоқчи
Шунингдек, Total Energies Ўзбекистонда электромобилларни зарядлаш шохобчалари тармоғини ривожлантирмоқчи.
Франциянинг Total Energies компанияси вакиллари «Ўзбекнефтгаз» билан музокаралар ўтказиб, Ўзбекистонда электромобилларни зарядлаш шохобчалари тармоғини ривожлантириш бўйича қўшма лойиҳаларни амалга оширишга қизиқиш билдирмоқда.
Шунингдек, Total Energies вакиллари Марказий Осиё минтақасидаги ваколатхонасини Тошкентда очишни режалаштираётганини маълум қилган.
«Ўзбекнефтгаз» бошқаруви раисининг трансформациялар бўйича биринчи ўринбосари Беҳзод Усмонов «яшил» энергияга босқичма-босқич ўтиш, шунингдек, бозорда электромобилларга бўлган юқори талабни ҳисобга олган ҳолда зарядлаш шохобчаларини кенгайтириш чора-тадбирлари ҳақида маълумот берган. Шунингдек, конларда upstream усулида ишлаб чиқаришни ривожлантириш ва Uzbekistan GTL’да углеводородларни чуқур қайта ишлаш бўйича янги лойиҳаларни ишга туширишга алоҳида эътибор қаратишини маълум қилди.
Маълумот ўрнида, Total Energies сўнгги йилларда экологик тоза энергия турларидан фойдаланишни фаол ривожлантирмоқда. Total Energies Франциянинг энг йирик нефт ва газ компанияси бўлиб, 130 дан ортиқ мамлакатда фаолият юритади. Компания ишлаб чиқариш ҳажми бўйича жаҳонда Royal Dutch Shell, British Petroleum ва ExxonMobil’дан кейин дунёда тўртинчи ўринда туради.
