Қозоғистон Ўзбекистондан Афғонистонга юк транзити учун имтиёзлар сўради
Остонада Қозоғистон ва Ўзбекистон Ҳукумат раҳбарлари ўринбосарлари Серик Жуманғарин ва Жамшид Хўжаев ишчи гуруҳларининг навбатдаги йиғилиши бўлиб ўтди.
Остонада Қозоғистон ва Ўзбекистон Ҳукумат раҳбарлари ўринбосарлари Серик Жуманғарин ва Жамшид Хўжаев ишчи гуруҳларининг навбатдаги йиғилишида икки мамлакат чегара пунктларининг ўтказувчанлигини ошириш, Қозоғистон кўмирини Ўзбекистонга ташиш тарифларини ошириш, «Хитой-Қозоғистон-Ўзбекистон-Туркманистон-Эрон» мултимодал транспорт йўналишини фаоллаштириш имкониятлари муҳокама қилинган.
Учрашувда Қозоғистон ун маҳсулотларини Ўзбекистон орқали транзити учун тарифларни пасайтириш имкониятларини муҳокама қилишга алоҳида эътибор қаратилган.
Маълумот учун, Ўзбекистон ҳудуди орқали Қозоғистондан Афғонистонга ун экспорти ҳажми тарихий максимал даражада 2017 йилда 1209 минг тоннага етди. Кейинги йилларда бу кўрсаткич сезиларли даражада камайди: 2021 йилда – 536 минг тонна, 2022 йилда – 816 минг тонна. Жорий йилнинг 6 ойи давомида – атиги 275 минг тонна.
Қозоғистон Афғонистонга ун экспорти бўйича салмоқли салоҳиятини ҳисобга олиб, Ўзбекистон томонидан темир йўл орқали транзит ташишда базавий тарифга имтиёзлар бериш имкониятини кўриб чиқишни илтимос қилган.
Шунингдек, учрашувда Қарағанда вилоятида ишга туширилиши режалаштирилган Artel маиший техника ишлаб чиқариш корхонасининг лойиҳа-смета ҳужжатларини ишлаб чиқиш якунланиб, қурилиш-монтаж ишлари олиб борилмоқда, жиҳозларнинг 10 фоизга яқини етказиб берилгани муҳокама қилинган.
Маълумот ўрнида, 2025 йилда фаолият бошлайдиган корхонада Artel бренди остида печлар, чангютгичлар, телевизорлар, мини печлар, кир ювиш машиналари ишлаб чиқариш режалаштирилган. Корхонанинг ривожланиш салоҳияти 8,95 миллиард АҚШ долларини ташкил этади, шундан 7,97 миллиард АҚШ доллари экспортга мўлжалланган.
Бундан ташқари, Қостанай вилоятида «СариаркаАвтоПром» заводи негизида 2024 йилнинг 1-чорагида Chevrolet Onix автомобилларини ишлаб чиқаришни йўлга қўйиш режалаштирилган. Шартномалар тузилиб, пайвандлаш, бўяш, йиғиш цехлари учун ускуналар ишлаб чиқарилгани қайд қилинган.
Чимкент ва Туркистон вилоятида тўқимачилик мажмуаларини яратиш лойиҳалари доирасида 2023 йил апрелда томонлар ўзбек навли пахта чигитини тажриба тариқасида Zhanassyl заводида экиш ва кейинчалик қайта ишлаш бўйича келишиб олганди. Ҳозир вилоятда 30 гектар майдонга янги «Наманган – 77» чигити экилган.
